Asawang nangabit gipasaylo sa bana

CEBU, Philippines – Gipasaylo ug dili na mopasaka og kaso ang bana batok sa iyang asawa nga nasakpang nakighilawas sa iyang kabit sulod sa usa ka motel sa Brgy. Carreta, Dakbayan sa Sugbo.

Gibutyag sa hepe sa Waterfront Police Station nga si Police Major Joemar Pomarejos nga wala makaantos ang bana nga nagtan-aw sa iyang asawa nga anaa sa prisohan.

Giingong nagka-istorya na ang duha ug napasaylo sa bana ang nagluib niyang asawa samtang nakagawas na sab sa prisohan ang kabit niini.

Nasayran nga dili kini ang unang higayon nga gipasaylo sa bana ang iyang asawa kay nadawat niini ang unom ka buwan nga anak ni misis sa iyang kabit dihang nauli kini sa Pilipinas gikan sa laing nasud.

Giingong lawom ang gugma sa bana sa iyang asawa sanglit giingong ‘high school sweethearts’ ang duha.

Nasayran nga nagpauban og polis ang 28-anyos nga bana sa dihang nakabasa siya og text message sa cellphone sa iyang 24-anyos nga asawa kinsa nakigsabot sa 48-anyos niini nga kabit kinsa minyo usab nga magkita sa usa ka mall ug molahos sila sa usa ka lawak.

Tuod man, nasakpan sa bana ug sa mga polis nga anaa sa kwarto sa usa ka motel ang duha nga gahubo na.

Gisikop ang duha, apan pag-abot sa presinto, natandog ang kasingkasing sa bana ug nakadesisyon nga dili na lang mopasaka og kaso tungod ug alang sa ilang mga anak. (/DILT)(BANAT NEWS)