Papa patay, masuso napagan

CEBU, Philippines — Patay ang usa ka lalaki samtang naangol ang lima pa ka buwan niining anak nga masuso sa dihang siya gipaulanan og bala sa tulo ka mga lalaki diha sa Sitio Buwaran, Block 7 , Barangay Sawang Calero, Dakbayan sa Sugbo niadtong Huwebes sa gabii.

Giila ang biktima nga si Jefferson Labuca Puebles, 26, taga Tres de Abril eskina Espeleta Street, Barangay Pahina San Nicolas. Samtang natumbok dayon sa kapolisan ang mga mamumuno nga giilang sila si Benjie Igot, Adonis Macario ug si Jestoni Mañacap, 18, pulos mga residente sa nahitaboan.

Base sa imbestigasyon nga gipanguluhan nila Police Major Albert Reeves sa Police Station 6  niduaw sa balay sa ilang higala si Puebles kauban iyang kapuyo nga si Dave Anne Foster dala ang ilang anak nga masusong lalaki. Apan diha palang sila sa dalan kalit silang giduol sa mga suspek ug walay daghang pangutana gidiretso sa pagpusil si Puebles.

Matud pa nga nagkugos pa sa iyang anak si Puebles sa dihang kalit kining gibira ug gikuptan nilang Macario ug Mañacap samtang si Igot diretsong nipaulan og bala sa kalawasan sa biktima.

Apil sa naigo sa bala ang gikugos nga anak ni Puebles kinsa giingong naigo sab sa kalawasan. Ang kapuyo ni Puebles gumikan sa kahadlok nikaratel og dagan pasud sa usa ka panimalay ug didto nitago.

Human sa pagpamusil daling nangikyas ang mga suspek padung sa wala matinong direksyon.

Ang mga tawo sa lugar dali nga nitabang sa manag-amahan ug gidala sila sa Cebu City Medical Center apan gideklarar nga wala nay kinabuhi si Puebles samtang ang iyang anak gibalhin ngadto sa Vicente Sotto Memorial Medical Center alang sa dinaliang operasyon. Ang Scene of the Crime Operatives nga gipanguluhan ni Police Lieutenant Reynaldo Ramos nakahipos og tulo ka basiyo sa bala ug usa ka wala pa matinong bala sa armas.

Gidudahan nga naalaan nga police asset ang biktima sa mga suspetsado nga giingong mga higala ra niini.

Sa follow- up operation, nadakpan ang usa sa mga suspetsado nga si Mañacap samtang gipangita pa ang iyang mga kauban. (/IBM)(BANATNEWS)