Babayeng Insik gikawatan og kwarta

CEBU, Philippines — Chinese National nga babaye, gikawatan og kwarta nga mobalor og P10 mil sa wa mailhing kawatan sa sulod sa giabangan niining panimalay sa Sitio Guiwanon, Brgy. Poblacion sa Lungsod sa Dalaguete, pasado alas kwatro sa kadlawon niadtong Sabado.

Sigon ni Police Corporal Rex Pelonio sa Dalaguete Police Station nga samtang natulog ang biktima giila nga si Liu Yang, 30-anyos kauban sa iyang higalang babaye nga Insik usab, adunay tawo ang misulod sa balay pinaagi sa bintana.

Dihang nakamatikod si Yang sa kasikas. Dali kining mipasiga og flashlight paingon sa suspek. Apan dali kining nakaikyas.

Unang nagtuo ang mga biktima nga walay nadala ang maong kawatan, apan dihang paingon na silang manglaag ug gihiling ang butanganan sa ilang kwarta, wala na ang P10 mil nga cash ni Yang .

Daling nagpalaban sa kapolisan sa Dalaguete ang biktima,. Ug basi sa imbestigasyon sa kapolisan, galisod sila pag-ila sa suspek kay nakalimot na si Yang sa hitsura sa tawo nga misulod sa iyang giabangang balay.

Adunay gidudaang suspek ang kapolisan nga maoy nangawat apan miingon si Yang nga dili kini mao.

Sa pagkutlo ning maong balita, padayon ang pagsuta sa kapolisan sa Dalagauet kon kinsa ang misakiyo sa kwarta sa babayeng Insik. (Jezebel G. Braulio, CNU Intern/DILT)

2 ka motorsiklo nagbangga, 4 angol

Nangaangol ang duha ka motorista ug ang ilang backrider human nagbangga sa may Sitio Lagang, Brgy. Bolinawan sa Dakbayan sa Carcar kagahapon sa buntag.

Ang mga naangol giila nga sila Rufo Phil Jr., 38-anyos taga Sitio Gibangkuan Brgy. Poblacion, Lungsod sa Sibonga uban ang iyang mga backrider nga sila Jackelyn Monteseno, 25-anyos, iyang bayaw ug si Rebecca De Jesus, 31-anyos iyang maguwang. Samtang ang iyang kabangga giila nga si Edmund Villaver, 25-anyos nga taga Sitio Ilaya, Brgy. Bolinawan, Dakbayan sa Carcar.

Basi sa imbestigasyon nga gipanguluoan ni Police Staff Sergeant Miguel Bernabe nga ang motorsiklo nga gimaneho ni Rufo, gikan sa Sibonga ug paingon sila Carcar proper.

Ang maguwang ni Rufo nga si Rebecca miingon nga mi-overtake si Villaver sa usa ka traysikol hinungdan sa ilang panagbangga.

Gumikan sa hitabo, nakaangkon og grabeng mga pangos ang mga nagmaneho sa motosiklo samtang ang mga angkas nakaangkon ra og garas sa ilang lawas.

Gidala sa Carcar District Hospital para matambalan ang mga nangaangol ug nagkasabot ra usab ang duha ka habig sa maong insidente. (/DILT)(BANATNEWS)