Plano sa Inayawan landfill

CEBU, Philippines — Wala pay klaro kon maaprubahan ang Safe Closure and Rehabilitation Plan (SCRP) sa Inayawan Sanitary Landfill karong umaabot nga Martes atol sa katapusang sesyon sa ika-14 Sangguniang Panlungsod sa Siyudad sa Sugbo.  Gimanduan sa konseho ang Full Advantage Phils. International Inc. (FAPII) nga usbon ug isumiter ang ilang plano sa dili pa mahuman ang termino karong buwana.

Sila si Konsehal Jocelyn Pesquera, Joel Garganera, ug Franklyn Ong ang mikwestiyon sa proposal nga pagputol gikan sa 15-meters nga gitas-on ngadto sa upat ka metros sa basura sa landfill kay basin unya og unsay epekto niini ngadto sa katawhan nga nagpuyo sa palibot. Si Dr. Bernard Tadeo sa FAPII miingon nga adunay mga kausaban sa plano nga ilang isumiter aron matubag ang ilang mga problema.

Mahitungod sa koral, si Tadeo miingon nga ang labing taas nga landfill mao ang 15 metros.

Una nang nangutana si Ong kon unsay mahitabo kon himuon nga duha o tulo ka metros ang ipabilin nga basura sa landfill ug dili upat. Gipasabot ni Tadeo nga momahal ang galastuhan sa kagamhanan niini.  Hinuon ang FAPII miuyon nga himuon kining upat ka metros. Alang sa leachate ug drainage sa landfill, si Konsehal Dave Tumulak miingon nga namatikdan niya sa plano nga gisugyot nga magpabilin ang 367,570 ka toneladang basura samtang gisugyot nga kuhaon ang 323,714 ka tonelada. Dugang niini nga wala siya makakita sa plano kon unsaon pagtangtang sa deposito sa methane.

Si Tadeo miingon nga adunay mga gas vents nga ipahimutang human sa pagputol sa ibabaw nga bahin sa landfill ug ang gidaghanon sa gas  dili makahatag sa mahinungdanon nga presyur o epekto.

Matud niya nga kini subay sa kamanduan sa Department of Environment and Natural Resources-Environmental Management Bureau-7.

Mahitungod sa leachate, si Tadeo mipadayag nga ang kompaniya magpabilin sa sukod sa pundong leachate, nga nag-ingon nga adunay rehabilitasyon sa kasamtangan nga pond. Dugang ni Tadeo nga ang plano mao ang pagpatuman sa Writ of Kalikasan  ug ang mga balaud sa kalikupan.  Gawas sa gisugyot nga waste-to-energy facility, girekomendar sa FAPII ang tulo ka kapilian kon unsay buhaton sa siyudad sa rehabilitated landfill, kini mao ang  industriya o ekonomiya, eco-park, ug sentro sa renewable energy. (/DILT)(BANATNEWS)