Ginang gipatay tungod sa selos

CEBU, Philippines – Usa ka 32-anyos nga babaye ang gipatay sa iyang 39-anyos nga  kapuyo tungod sa selos diha sa Sitio Patag, Barangay Bonbon ning Dakbayan sa Sugbo niadtong lunes pasado alas 10:30 sa buntag.

Base sa imbestigasyon ni Police Staff Sergeant Mark Daclan gidunggab dose ka higayon sa kapuyo ang biktima.

Matud niya, ang suspek niangkon nga nasuko ug nagduda na kini sa biktima tungod kay tagdugay na kining mouli.

Hangtud nga nasakpan niini ang biktima nga mipasumangil nga mipauli kini sa probinsya apan dili kadto tinuod kay wala kini mouli didto ug nagduda ang suspek nga duna na kini laing karelasyon.

Nadunggan sa pag-umangkon sa biktima nga nagkalalis ang duha niadtong orasa diha sulod sa panimalay mao nga iyaha kining gitan-aw.

Matud pa nga pagtan-aw sa pag-umangkon nakita niini ang pagkuha sa suspek sa kutsilyo ug gidunggab niini ang biktima sa walang bahin sa dughan sa makadaghang higayon nga miresulta sa daling kamatayon sa babaye.

Daling miresponde ang Emergency Medical Service nga gipangulohan ni Maefleur Subang Bonghanoy . Gitabang ang biktima apan wala na kini pulso.

Sa pakisusi sa Scene of the Crime Operatives (SOCO) nga gipangulohan ni Police Captain Prescilo E. Libato , 12-inches ang gitas-on sa kutsilyo nga gigamit sa pagdunggab niini.

Nadakpan ang suspek ni Police Corporal Aldrin Pelayo ang Police sa Barangay Bonbon, Cebu City ug nagtingkagol na sa Mabolo Police Station. (/IBM)(BANAT NEWS)