Barangay Suba sa Samboan gisuplayan og tubig
CEBU, Philippines — Gihangop sa mga residente sa Barangay Suba, Lungsod sa Samboan human sila nakadawat og supply sa tubig gikan sa lokal nga kagamhanan sa lungsod ug sa Bureau of Fire Protection (BFP).
Ang mga residente sa maong barangay nakasinati kini og problema sa tubig tungod sa huwaw.
Sayo sa buntag nag-atang na sa dalan si Nilo Barberos uban sa laing mga residente diin nagbitbit sila og mga sudlanan sa tubig.
Ang mga residente nga naapektohan sa grabeng huwaw naproblema og tubig nga gamiton alang sa paghugas, paglaba ug ikaligo ilabi na sa mga bata panahon sa pagtungha.
Ang LGU sa Samboan nagdala og tulo ka dagkong tangke nga puno sa tubig nga giapod-apod ngadto sa mga residente.
Dili lang tulo ka tangke nga tubig ang ihatag sa LGU diin kong adunay wala pa mahatagi og tubig o wala pa mapuno ang mga sudlanan ug nahurot na ang dala nilang tulo ka tangke hakotan na usab nila kini ug mobalik sila sa lugar aron ang tanan maapod og hatag og tubig.
Ang mga residente sa lugar nanghinaot nga matapos na ang huwaw aron makabaton na og igong pundo sa tubig ug moagas na ang ilang mga gripo. (BDB) (BANAT NEWS)
- Latest