Sunog sa Quiot-Pardo usa angol P600 mil danyos
CEBU, Philippines — Usa ang naangol sa nahitabong sunog sa Sitio Bogo 1, Barangay Quiot Pardo, Cebu City kagahapon sa kaadlawon ug nagbilin kini og P600 mil nga danyos sa upat ka balay nga gilamoy sa maong sunog.
Giila ang napaso sa tiil nga si Mamerto Carao nga trabahante sa Cigin Construction nga kompanya nga gipanag-iya sa managtiayong Gina Undaloc ug Cirilo Undaloc.
Giingon nga gipapuyo ang pamilya ni Carao sa maong bunkhouse. Base sa imbestigasyon ni Senior Fire Officer 2 Leo Paser nga ang sunog nagagikan sa bunkhouse.
Si Carao ug ang iyang higala nga si Sergio Perez naa sa sulod sa bunkhouse dihang nahitabo ang maong sunog.
Alas 12:18 sa tungang gabii nadawat ang alarma sa kabomberohan. Ang sunog nitapon sa warehouse. Ang sunog napawong alas 2:25 sa kaadlawon.
Gawas sa bunk house aduna usab lain upat ka mga panimalay ang hingpit nga naugdaw.
Matud pa ni Senior Fire Officer 1 Leo Pastrana, investigator sa kaso nga ilaha pa ipaubos sa imbestigasyon ang sunog aron masayran kung unsay hinungdan sa pag-ulbo sa kayo. (Jezebel Braulio CNU Intern IBM) (BANAT NEWS)
- Latest