Fraternity ug gang sa Talisay gi-monitor sa kapolisan
CEBU, Philippines – Tulo ngadto sa upat ka fraternity ug gang ang gi-monitor karon sa kapolisan sa Dakbayan sa Talisay ilabi na nga nagsugod na ang klase karong tuiga.
Kini maoy gipahibawo ni Police Lieutenant Colonel Marlu Conag, hepe sa kapolisan sa siyudad.
Matud ni Conag nga ang mga magtutudlo nisumbong kini kabahin sa grupo sa mga batan-on diin giingong mohimo og dili maayo.
“This is what we prevent na gagamitin nila itong mga kabataan na nasa eskwela pati na rin yong nasa elementary”, matud ni Conag.
Si Conag nagkanayon nga alarming ang maong insidente gumikan kay lakip ang mga estudyante sa elementarya gisuwayan og agni sa maong grupo.
Si Dr. Arden Monisit, schools division superintendent sa Department of Education (DedEd) sa Siyudad sa Talisay nagkanayon nga ang tabang sa kapolisan maoy labi nila nga gikinahanglan.
Samtang ang mga magtutudlo ang ni-edukar sa kabataan kabahin sa values o ang maayong gimbuhaton sa usa ka tarong nga tinun-an o tawo sa katilingban.
Si Conag nipasalig nga kon aduna sila’y mahibaw-an nga magpahigayon og initiation ilaha kining sikopon. (/BDB)(BANAT NEWS)
- Latest