Binaliw landfill way nag-monitor

CEBU, Philippines – Nanawagan si Konsehal Joel Garganera sa Cebu City Environment and Natural Resources Office ug City Health Department nga mohimo og aksyon sa reklamo sa mga residente sa Barangay Binaliw labot sa operation sa 15-hectare material recovery facility ug engineered sanitary landfill.

“Ang akong gusto before kaning mga offices mo-act, like EMB-7 and DOH, ang akoang pangutana, unsa may gibuhat sa atoang CCENRO, unsa may gibuhat sa atoang City Health Department?” matud ni Garganera.

Asoy niini ang CCENRO ug CHD angayan nga moumol og kaugalingong findings base sa scope sa ilang trabaho aron ang problema dali nga maresolbar.

Reklamo sa mga residente sa Binaliw ang giingong dili maagwanta nga baho ug pagkuyanap na sa sakit sama sa respiratory illness.

Sigun ni Garganera nga importante nga ang CCENRO ug CHD dunay findings aron pagtino o paghimakak ba sa reklamo sa mga residente.

Sa iyang nahibaw-an ang notice of violations sa ARN Central Waste Management, Inc., ang kompaniya nga nagpadayon sa landfill, way kalabutan sa reklamo sa mga residente.

Ang ARN matud pa nakalapas sa lagda sa Philippine Environment Impact Statement System ubos sa Presidential Decree (PD) 1586 ug giingong nakalapas sab sa conditions sa Environmental Compliance Certificate (ECC) nga giisyu sa DENR niadtong Nobiyembre 3, 2017 ug uban pa.

Nidugang ang konsehal nga ang maong mga buhatan sa siyudad regular nga mo-monitor sa operation sa landfill aron maseguro nga nituman sila sa environmental  laws ug sanitary  requirements.

“Ang Binaliw sa una daghang violations, nakadungog mo nga they we’re being penalized? They we’re able to file the corresponding fine, if any? Wala, cease and desist ra. Kinahanglan, naa ta’y local offices which are task to oversee the operation and they should take cognizance at least ma-monitor nato,” matud ni Garganera.

Samtang ang konseho sa Barangay Binaliw ug ARN Central Waste Management, Inc. motambong unya sa scheduled technical conference sa Environmental Management Bureau (EMB) 7 karong adlawa.

Ang technical conference kabahin sa reklamo nga gisang-at sa konseho sa barangay niadtong Mayo 27. (/GMR)(BANAT NEWS)