Mga nasunogan makabalik og tukod sa ilang balay — Palomo

CEBU, Philippines — Ang tanang 615 ka indibidwal nga nasunogan diha sa Barangay Mambaling, Dakbayan sa Sugbo ang tugotan nga makatukod og balik sa ilang mga balay human sa clearing operations sa ilang lugar.

Si Konsehal Anne Marie Vestil-Palomo sa Barangay Mambaling nagkanayon nga gipanag-iya sa kagamhanan ubos sa Slum Improvement Resettlement (SIR) program ang maong luna.

Ang maong programa nagtugot sa mga pamilya nga magbayad sa ilang giukopahan nga luna ubos sa installment sulod sa 25 ka tuig.

“Re-blocking is needed to identify and to see to it that the structures to be built conformed with emergency and safety standards with proper pavements and pathways and also to see to it that no encroachments to the lots allotted only for the SIR beneficiaries.  This is really up to DWUP”, matud ni Palomo.

Gipasabot ni Palomo nga ang pagpatuman sa re-blocking nga pamaagi mao na ang standard human sa usa ka kalamidad aron masiguro ang accessibility sa mga sakyanan kon adunay mahitabong emerhensiya sama sa sunog.

Matud usab ni Palomo nga ang mga miyembro sa konseho sa barangay magtagbo aron ang barangay mapaubos kini sa state of calamity aron ang pundo sa barangay alang sa kalamidad magamit kini.

Sa pagkakaron, ang barangay adunay P527,000 nga pundo alang sa dali nga tubag sa kalamidad ubos sa budget sa 2018.

Niadtong Biyernes sa alas 10:00 sa gabii usa ka dakong sunog ang niulbo diha sa lugar nga niugdaw sa 105 ka balay nga giukopahan sa 156 ka pamilya diha sa Sitio Puntod ug Huyong-Huyong.

Si Flora Bartolome, hepe sa Department of Social Welfare and Services sa Dakbayan sa Sugbo nagkanayon nga ang siyudad manghatag og libre nga pagkaon sa tulo ka sunod-sunod nga adlaw, home kit nga adunay sulod nga canned goods ug bugas nga nagkantidad og P500 ug ang matag pamilya hatagan usab og housing kit nga adunay mga housing materials nga nagkantidad og P2,000. (Rowena D. Capistrano/BDB)(BANATNEWS)