Mga polis biktima sa investment scam
CEBU, Philippines – Duha ka kompanya sa investment scam nga nakabiktima og mga polis sa Mindanao ang giingong nakasulod na sa Sugbo.
Base sa mindanews.com sa General Santos City gihinganlan ang mga investment company nga Alamco/Almamico ug Kapa Community Ministry nga daghang mga residente ug mga polis na ang nailad niini sa Mindanao.
Modus nila mao nga ipa-miyembro ang mga biktima ug saaran og 30 ngadto sa 35 porsyento nga monthly payout.
Ang direktor sa Police Regional Office-7, Brigadier General Debold Sinas, nagkanayon nga nakasulod na kini sa Rehiyon 7 ug anaa kini sa Lungsod sa Compostela, Cebu ug sa Negros Oriental.
Matud ni Sinas nga mga polis ang gipang-agni niini og una aron makakuha pa og daghang mga mabiktima.
Dugang ni Sinas nga ang mga polis sa Pagadian City, Zamboanga del Sur nga nangapil sa maong investment giingong dili na manarbaho tungod sa kadaku sa madawat nga kwarta sa maong investment company.
Apan sa pagkadispalko sa kompanya, giingong hapit sila magpinusilay.
Nanawagan si Sinas sa publiko ilabi na sa mga polis nga dili magpadala sa maong “easy money” investment.
“Warning nako lalo na ang mga polis naa na diri, ang Alamco/Almamico ug Kapa mga scam gikan og Mindanao,” sigun ni Sinas.
Kasamtangan karon nga gigukod sa mga awtoridad ang maong mga kompanya aron dili na makabiktima pa. (/GMR)(BANAT NEWS)
- Latest
