Pinusilay, tulo patay

CEBU, Philippines – Tulo ang patay lakip ang suspek sa pakigpinusilay sa kapulisan didto sa Barangay Lawaan 3, Dakbayan sa Talisay mga alas 11 sa buntag kagahapon.

Ang mga biktima nga unang nakabsan sa kinabuhi mao sila si Kapitan Jimmy Bartilic ug si Mc Jade Ybañez, anak sa kanhi kapitan sa Brgy. Lawaan 3 ug nagsilbing step son sa suspek nga si Dean Torrefranca.

Sa impormasyon nga nakuha sa Banat News, si Ybañez ug si Torrefranca wala nay maayong relasyon sa dihang namatay ang inahan ni Ybañez nga si kanhi kapitan Dehlia Ybañez niadtong miaging tuig. Gusto ni Ybañez nga papahawaon sa ilang pinuy-anan si Torrefranca ug nagpatabang kini sa barangay aron unta maghusay apan wala magkasinabot ug nipauli ang suspek kay didto ra niya gustong mahitabo ang panaghusay. Gisundan kini nila ni Ybañez ug kapitan Bartilic kauban ang mga konsehal ug sa mga tanod apan pagsulod nila sa balay gipabuthan sila ni Torrefranca hinungdan nga nagkatibuwaag na sila sa panagan.

Si Ybañez naigo apan nakadagan pa gyud kini uban ni Bartilic. Nisulod sila sa laing pinuy-anan aron motago apan gisundan sila sa suspek ug gipangtiwasan gamit ang ang taas nga armas hangtud nga namatay. Si Torrefranca nibalik sa ilang pinuy-anan ug didto gipaabot ang mga polis ug hangtud nga nakigpinusilay kanila. Nasuta nga si Torrefranca giingong kanhi sakop sa US Marines Corps.

Gisunog sab matud pa sa suspek ang balay diin siya nagpahipi aron dili siya daling makit-an sa mga otoridad. Si Chief Insp. Ardeolito Cabagnot, deputy chief sa Talisay City Police Station nidesider nga mosaka sa atop aron makita ang suspek. Apan gumikan sa kainit nibalik siya pagkanaog apan una pa kini nahitabo nakigpinusilay pa kini sa suspek. Mga usa ka oras kapin o kulang ang ilang sinukliay og bala sa suspek ug mga sakop sa Special Weapons and Tactics ug ubang kapolisan sa siyudad hangtud nga nakapaduol si Cabagnot sa gituohang lawak diin nagtago ang suspek.

“Mga one meter lang gyud among gilay-on sa suspek pero nipasalipod ko sa bung-bong dayon gipalusot nako ang tumoy sa akong armas dayon paarak,” asoy pa ni Cabagnot. Siya nagkanayon nga giusban pa gyud niya og usa ka magazine ang kwarto kun diin nagtago ang suspek ug wala na sila nakadungog og bawos gikan sa suspek.

Sa ilang paglili, naghayang na ang suspek nga nagsuot og bullet proof vest ug nag-isa sa iyang duha ka kamot nga nikupos gumikan sa grabeng kainit sa sulod sa lawak.

Nakita sa tupad sa suspek ang napaig nga AK-47 ug gituohang aduna sab kini M4 Assault Rifle ug granada ug uban pang gamit pang-militar. Ayha pa nakaduol ang mga bombero dihang napatay na si Torrefranca.(Camille Pateres/IBM)(BANAT NEWS)