‘Low turnout’ sa cebu city

CEBU, Philippines – Nakatala ang buhatan sa Commission on Elections og ubos nga turnout sa namotar sa Siyudad sa Sugbo sa bag-ohay lang nahuman nga eleksiyon itandi niadtong 2016 ug 2013.

Ang turnout karong tuiga naa sa 76.10 porsiyento diin ubos kini itandi sa 83 porsiyento sa 2016 ug 81.36 porsiyento sa 2013 nga mga piniliay.

Sa 709,608 registered voters sa Siyudad sa Sugbo, naa lang sa 540,013 ang nakabotar atol sa National ug Local Elections niadtong Lunes.

Hinoon gihulagway ni Cebu City North District Election Officer, Atty. Chauncey Boholst, nga ang 76.10 porsiyento nga turnout niining tuiga dili makonsiderar nga low voter turnout.

“Nindot kaayo incidentally kay gitan-aw pud nako ang turnout per barangay, dagku og turnout ang bukid, Agsungot ug Pung-ol, like ang one is 86 something percent and the other one is 88 percent so mas daku sila og voter turnout sa bukid kaysa diri sa urban barangays,” matud ni Boholst.

Sumala pa ni Boholst nga nagpasabot lang kini nga ang katawhan sa bukirang barangay nibotar gyud taliwala sa giingong pagpanghadlok nga nahitabo. “It only shows nga despite sa katong di ba naa man toy mga previous news reports nga there were alleged violence ngadto sa kabukiran pero ang nahitabo wala diay mahadlok ang mga tawo, ni-exercise sila sa ilang right to vote despite the fact nga naay alleged threats sa ilang security,” dugang ni Boholst.

Kadtong mga wala nakabotar dili pa mapapas ang ilang ngalan sa list of voters apan kun kaduha na ka eleksiyon nga wala kabotar, diha na papason ang ngalan sa listahan.

Niadtong 2016 niabot sa 524,850 ang nakabotar gikan sa 630,003 registered voters sa siyudad diin si Mayor Tomas Osmeña nidaug nga dunay 259,089 ka botos samtang si kanhi mayor Michael Rama nakakuha og 224,705 ka botos.

Niadtong Lunes, si Osmeña gipilde ni Bise Mayor Edgardo Labella sa pagka-mayor samtang si Rama sab ang nidaug sa pagka-bise mayor. (/GMR)(BANAT NEWS)