60% sa kinatibuk-an ang mibotar sa Central Visayas

CEBU, Philippines – Taliwa sa mga aberya, gikonsiderar nga nagmalampuson ang piniliay kagahapon diin miabot sa 60 porsiyento ang voters turn-out. “There is no failure of elections in Central Visayas. We’re happy na nahuman ang elections without major untoward incident,” sigun sa direktor sa Police Regional Office-7 nga si Brigadier General Debold Sinas.

Sigon ni Sinas nga walay natala nga gi-harass nga mga Board of Election Inspectors (BEI).

Nasayran nga usa sa mga aberya mao ang kalit nga pag-brownout sa mga lugar sa amihanang bahin sa Lalawigan sa Sugbo.

Mga alas 7:45 sa gabii napawong ang linya sa kuryente sa Talisay Grid diin apektado ang upat ka mga lugar nga gilangkuban sa Dakbayan sa Bogo, Medellin, Daanbantayan ug San Remigio.

Sigon pa sa Regional Election Director nga si Attorney Veronico Petalcorin nga nahuman na og botar ang mga dagkung barangay sa maong mga lugar ug nag-transmit na sa mga botos.

Matud niini nga wala kini nakaapekto ingon man sa mga barangay nga wala pa nahuman og botor sanglit adunay extra nga bateriya ang tagsa-tagsa ka mga makina nga makaandar ug usa pa ka adlaw.

Kon ugaling mahurot ang bateriya ug wala pa sila mahuman og transmit, giingong mahimo rang gamiton ang bateriya sa sakyanan o motorsiklo aron makadagan kini.

Sa laing bahin, pipila ka mga vote counting machine ug mga Voters Registration Verification Machine ang nagka-aberya sab.

Sa kinatibuk-an, 124 kabuok VRVM ang naguba ug 80 sab ka VCM.

Depensa ni Petalcorin nga gamay ra kini sanglit kapin 600 ka mga back-up nga makina ang naabot sa Central Visayas.

Sa datos sa PRO-7, 254 ka kaso ang ilang natala nga krimen sa 2018 samtang karong tuiga, mikunhod kini og 181. Walo usab ka at-large sa Negros Oriental  human nanagan  pag-abot sa mirespondeng mga polis.

Sa gun ban, upat ka mga loose firearms ang nasakmit ug napulo kabuok ang gitahan ngadto sa mga istasyonan sa polis.

Sa datos sab sa mga nadakpan sa liquor ban, miabot sa 453 ka mga operasyon nga gilusad sa kapolisan, 123 kabuok ang nasikop samtag tulo ka mga menor de edad ang na-rescue.

Ang Mandaue City Police Office mipahibawo sa ilang kalampusan sa gihimo nilang mga pahimangno sa mga mulopyo labot sa gipatuman nga iquor ban hinungdan nga wala sila makadakop og mga nakahimo sa maong kalapasan.

Gimando ni  Police Colonel Julian Entoma, director sa MCPO ngadto sa iyang mga hepe sa unom ka mga presinto, sa paglibot sa mga barangay nga ubos sa ilang kaakohan alang sa pagpahibalo sa gipatuman nga liquor ban.

Nasayran nga tibuok adlaw ug gabii nga nagpatrolya ang kapolisan aron sa pagsuta sa mga molapas sa maong kamanduan. Apan sa Lungsod sa Consolacion, duha ka tawo sa Brgy. Nangka ang wala manumbaling niini hinungdan nga sila gidakop.

Si Police Corporal Saturnino Inoc sa Consolacion Police Station miingon nga alas 12 pasado sa tungang gabii, sa ilang pagpatrolya sa hilit nga dapit sa Brgy. Cansaga, ilang naaktuhan ang duha ka tawo nga nag-inom og ilimong makahubog mao nga nagtingkagol sila karon sa prisohan.

Karong tuiga nga piniliay, gihatagan og pagtagad ang maayong panglawas sa kapolisan nga miserbisyo sa maong kalihukan human adunay nakalas nga polis didto sa Batangas human giataki.

Matud ni Police Regional Office-7 director Brigadier General Debold Sinas nga ang ilang health services mituyok sa mga presinto aron sa pagsiguro sa kahimtang sa kapolisan nga maayo ang ilang panglawas samtang nagserbisyo sa eleksyon. Ang health services alas dose sa udto kagahapon nakahimo og 249 ka check-up sa blood pressure, pagpanghatag og 802 ka vitamins, 15 ka facemask ug mga nagkadaiyang medications diin adunay duha ka polis ang high blood ug 802 ka health tip brochures ang ilang nahatag.

Gitug-an ni Sinas nga hangtud ning pagsulat, padayon pa gihapon ang serbisyo sa kapolisan sa nagpadayong nga inihapay sa mga balota dinhi sa Dakbayan sa Sugbo ug Lalawigan sa Sugbo. (Romeo T. Limpangog ug Rowena D. Capistrano/DILT)(BANAT NEWS)