3 nakuhaan og armas; 2 nasakmitan og drugas
CEBU, Philippines — Tulo ka tawo ang nasikop dihang giimplementar ang search warrant sa kapolisan sa kabukiran sa Dakbayan sa Sugbo diin adunay nakuhaan og mga armas.
Mipahigayon sa maong operasyon ang CMFC nga gipangulohan ni PLT Mariel Ann Piedad diin bitbit nila ang search warrant nga giluwatan ni Hon.Pamela Baring, 2nd Vice-Executive Judge of RTC 7, Br. 21 Cebu City
Unang giimplementar ang search warrant mga alas 12:22 sa kadlawon sa may Sitio Busay, Brgy. Paril ug nasikop si Geremae Cerojano, 38-anyos, residente sa maong lugar.
Nasakmit gikan sa dinakpan ang usa ka kalibre 38 nga armas nga adunay mga bala.
Sa ikaduhang operasyon, nasikop sa may Sitio Gaang sa mao gihapong barangay si Roel Soten diin nasakmitan kini og kalibre 38 nga revolver ug lima ka buhing bala.
Ang search warrant batok ni Soten giluwatan ni Presiding Judge Soliver Peras sa RTC Branch 10 sa Dakbayan sa Sugbo.
Atol sa ikatulong operasyon sa may Proper Paril, mga alas kwatro sa kadlawon, nadakpan si Edwin Mabini ug nakuhaan kini og usa ka kalibre 45 nga armas nga adunay bala.
Ang mga dinakpan nagtingkagol na karon sa prisohan ug gipaabot nga mapasakaan og kaso.
Sa Dakbayan sa Lapu-Lapu, tulo ang nasikop sa kapolisan atol sa managlahing buybust operation nga maoy hinungdan sa pagkasakmit sa mokabat P50 mil nga kantidad sa shabu. Si Police Lieutenant Jose Leo dela Fuentes sa City Intelligence Branch (CIB) sa LCPO miila sa mga nadakpan nga mao sila si Ronald Maano, 27- anyos nga taga Brgy. Nangka sa Lungsod sa Consolacion kinsa nakuhaan og 16 ka gagmayng pakete sa gituohang shabu.
Nakuhaan usab kini og P300 nga buybust money ug P500 nga gituohang halin sa pagbaligya og shabu sa Sitio Mustang, Brgy. Pusok. Laing nasikop sa Sitio Sea Breeze, Brgy. Pusok pasado alas siete sa miaging gabii mao si Ryan Samolde, 25-anyos nga taga Brgy. Agus.
Nakuha gikan kaniya ang 21 ka gagmayng pakete sa gituohang shabu nga ang tanan mokantidad og P25, 976. Uban sa nasakmit gikan kaniya ang P500 nga halin ug P300 nga buybust money.
Matud ni dela Fuente nga natigayon ang maong operasyon human misumbong kanila ang pipila ka mga residente sa lugar. (Romeo T. Limpangog/DILT)(BANATNEWS)
- Latest
