CCTO motugot mo-parking sa kadalanan

CEBU, Philippines — Miawhag ang Cebu City Transportation Office (CCTO) sa mga drivers sa pag-obserbar sa saktong parking aron dili makababag sa dagan sa trapiko atol sa adlaw sa piniliay.

Ang operations chief sa CCTO nga si Francisco Ouano miingon nga tugotan nila ang mga nanag-iya og mga sakyanan nga maka-park sa dalan basta dili lang makabalda sa trapiko.

Midugang kini nga mo-obserbar sila og maximum tolerance sa mga malapason nga mga drivers sanglit election period man diin daghang sakyanan ang moadto sa mga polling centers.

“Maximum tolerance ta kay kibaw man gyud ta nga tungod sa kadaghan sa mobotar, dili istriktohon karon”, matud ni Ouano. Kasagaran sa 500 ka mga traffic enforcers, adto gipakatap sa mga dapit nga duol sa polling centers aron maoy mo-monitor ug mobantay sa sitwasyon sa trapiko.

Pipila sa mga barangay nga daghang registered voters mao ang Guadalupe, Lahug, Banilad ug Basak San Nicolas.

Sigon ni Ouano, madumala ra ang trapiko sanglit ang pagbotar gikan sa alas sais sa buntag hangtod sa alas sais sa gabii ugmang adlawa.

“Mostly sa gawas ra gyud kay restricted ang eskwelahan. Pwede sila maka-park along the road. Ang importante dili sila maka-obstruct kay ang atong tuyo kay bisan kinsa pwede maka-park”, dugang ni Ouano.

Gipahibawo usab niini nga ang underpass sa Natalio Bacalso Avenue temporaryong gibuksan sa mga pribadong sakyanan sugod kagahapon sa alas 12 tungang gabii hangtud sa Mayo 13 sa alas 12 sa tungang gabii gihapon aron makatabang nga maluag-luagan ang kahuot sa trapiko sa South District. (/DILT)(BANATNEWS)