Sakop ni Sabalones ang 2 ka tawo nga gipatay
CEBU, Philippines – Gipahibawo sa Talisay City Police Station nga mga sakop sa inilang drug lord nga si Franz Sabalones ang duha ka tawo nga gipatay samtang nagsakay og taxi sa may Brgy. Dumlog, Dakbayan sa Talisay niadtong miaging semana.
Nasayran nga gikan mipiyansa ang duha ka biktima nga sila si Joel Generalao ug Alvin Cueva subay sa kaso nga ilang giatubang nga pagpamaligya og ginadiling drugas. Samtang sakay sila og taxi, uban ang ilang mga kabanay, gibabagan sa duha ka mamumuno ang ilang gisakyan ug gipakanaug ang mga pasahero gawas sa duha ka biktima dayon gipamusil.
Matud ni PO3 Glenn Besande, imbestigador sa kaso nga sa wala pa nasikop ang mga biktima, aduna pa kini kuwang sa ilang amo apan wala kini makahatag gumikan sa ilang pagkasikop.
Asoy pa ni Besande nga dugay na nga player ang duha apan mag undang-undang sila sa negosyo aron dili dali nga mahibaw-an.
Apan sa pangutana kon anaa pa ba nagtuyok sa Talisay ang mga drugas ni Sabalones, dili pa makatubag si Besande.
Sigon niya nga ila pang gisusi ang “butang” o shabu nga makita nila sa dakbayan kon kinsa ang nanag-iya niini.
Padayon pa hinuon ang ilang imbestigasyon kon kinsay nagpatay sa duha.
Sa laing bahin, wala pay mikuha sa patayng lawas sa giingong asset sa kapolisan sa Talisay nga gipatay ug pabilin kining anaa sa punerarya.
Giila ni PO3 Besande ang namatay nga si alyas Mayor diin sa inisyal nga imbestigasyon, nasuta nga uban ang biktima sa upat ka mga lalaki sa Sitio Rattan, Brgy. Tanke aron manuyop og ginadiling drugas.
Apan kalit nga naabot ang duha ka mga lalaki nga nagsul-ob og bonnet ug itom nga jacket dayon pusil sa biktima. Nag-iyahay sab og alibwag ang mga kauban niini atol sa hitabo.
Matud ni Besande, posibleng adunay naglagot sa biktima nga player sa ginadiling drugas. Nunot niini, gipanawagan ni Besande ang katawhan nga adunay kabanay nga lalaki wala pa mauli sa ilang panimay sa pagsusi niini sa St. Francis Funeral Parlor. (/DILT)(BANAT NEWS)
- Latest