Seguridad pahugtan atol sa 'kadaugan sa Mactan'

CEBU, Philippines – Hugot nga pagabantayan  sa kapolisan sa Dakbayan sa Lapu-Lapu ang tinuig nga re-enactment sa Kadaugan sa Mactan nga seguradong hugupan sa bagang duot sa mga tawo lakip na ang mga turista nga gusto musaksi sa maong kalihukan.

Nunot sa paghatag og kasiguroan sa maong  kalihokan ang kapolisan nga pangulohan ni Senior Inspector  Limuel Obon ang nagdistino sa iyang mga sakop sa kapolisan  sa pagpatuman sa kahapsay ug kamalinawon.

Naglakip sa pagabantayan sa kapolisan mao ang palibot sa Liberty  Shrine nga nahimutang usab  ang daghang mga tawo gikan  sa kabarangayan sa maong dakbayan sa pagsaksi sa re-enactment sa Kadaugan sa  Mactan nga paga-apilan sa grupo sa mga lokal nga eskrimador.

Masinati usab  ang hugot nga pagbantay sa mga traffic enforcer nga maoy mopahapsay  sa dagan sa mga sakyanan nga molabay  sa maong lugar sa ilang pagpadulong sa Barangay Puna Ingaño, Barangay Maribago, Barangay Agus ug uban pa.

Sa nasayran nga gisaulog sa Dakbayan sa Lapu-Lapu ang matang Abril  27  sa matag tuig nga nahimo na nga kulturanhong kalihokan sanglit ihulagway man pinaagi niini ang kahimtang sa mga molupyo sa maong lugar sa nakalabay nga 16  century.

Ang  re-enactment sa panagsangka nila ni Magellan ug Lapulapu nga pagahimoon sa daplin sa baybayon sa Barangay  Mactan  maoy paghinumdom sa mga nahitabo sa makasaysayanon  nga   kanhiay nga panahon.

Ang buhatan sa City Traffic Management System sa  maong dakbayan ang mopatuman usab   og mga kausaban sa dagan sa mga sakyanan samtang  nagpadayon pa ang pagpasiugda sa maong kalihokan sa Battle of Mactan. —/LPM (BANAT NEWS)