Nibugaw sa mga anak na-entrap
CEBU, Philippines – Sa prisohan karon magbakasyon og taas-taas nga panahon kining 45- anyos nga inahan nga nasikop sa entrapment operation sa mga otoridad human giingong iyang gibugaw ang kaugalingong mga anak nga babaye sa online kagahapon didto sa Dakbayan sa Mandaue.
Base sa report sa International Justice Mission, nag-edad og 6 ug 7 anyos ang mga anak sa suspek nga iyang gikuhaan og malaw-ay nga hulagway ug gipadala sa iyang kliyente nga langyaw pinaagi sa internet.
Gipugngan sa mga otoridad ang pangalan sa dinakpan aron maprotektahan ang mga anak niini.
Nadiskubrehan sa mga otoridad ang modus sa suspek dihang iyang gibaligya ang 15 anyos nga anak sa iyang malaw-ay nga langyaw nga parokyano.
Nunot sa pagkadiskubre sa kapolisan sa iyang operasyon gihimo dayon ang entrapment operation nga niresulta sa iyang pagkasikop.
Apil sa giluwas sa Women and Children Protection Desk-Central Visayas ug IJM ang lain pang duha pa ka mga menor de edad nga anak sa suspek nga nag-edad og 13 ug 17 anyos.
Ang mga bata gikatakdang ipahiluna sa Department of Social Welfare and Development samtang gihikay ang kaso batok sa ilang inahan. (/IBM)(BANAT NEWS)
- Latest