CCPO suportahan ni Albayalde

CEBU, Philippines – Si Philippine National Police Director General Oscar Albayalde mosuporta sa Cebu City Police Office sa Dakbayan sa Sugbo kun tinud-on ni Mayor Tomas Osmeña ang bahad nga tangtangan og suporta ang kapulisan sa higayon nga dili masulbad ang pagpangrakrak sa mga balay sa kaalyado niini nga kapitan.

Matud pa ni Albayalde, subo kaayo pamalandongon nga matag higayon adunay mga panghitabo orada-orada polis gilayon ang pasanginlan.

Sumala pa ni Albayalde, ilaha kining imbestigahan ug kung tinuod ang pasangil ni Osmeña matangtang gyud sa serbisyo ang maong mga polis.

Gihagit hinuon ni Albayalde ang mayor nga kun duna kini ebidensya mas maayong ihatag niya kini sa mga imbestigador ug dili kutob lang sa pamasangil ug estorya.

Kahinumdoman nga si Osmeña niduaw dayon sa mga kapitan sa Sinsin ug Sudlon Dos nga silang Aurelio Ascuña ug Prescilo Albores kansang mga balay girakrakan og mga armadong mga tawo apan walay naigo sa ilaha niadtong Abril 4 sa kaadlawon.

Politika maoy gidudahan sa mayor nga motibo ug nagduda kining polis ang naghimo sa krimen kay nagpagamit sila sa ilang kaatbang.

Si Albayade naglibot-libot karon sa nasud aron pagpasidaan sa mga sakop nga dili sila mahimong modapig og politiko karong umaabot nga eleksyon sa Mayo. (/IBM)(BANAT NEWS)