Magsuong mayor ug bise mayor gidakop
CEBU, Philippines – Magsuong Mayor ug Bise Mayor sa Lungsod sa San Francisco sa isla sa Camotes gidakop tungod sa illegal nga armas ug granada atol sa pagronda sa mga operatiba sa Cebu Provincial Police Office-Provincial Drug Enforcement Unit sa ilang balay diha sa Barangay Poblacion kagahapon sa buntag.
Nangapriso ang managsuon ug running mates nga silang San Fransisco Mayor Aly Aranas Arquillano ,58, ug Bise Mayor Alfredo Aranas Arquillano Jr., 62, sa May 13 elections.
Pinasikad sa search warrant nga pinirmahan ni Judge Leopoldo Cañete sa RTC branch 60, Barili, gironda ang ilang mga panimalay tungod sa report nga duna silay mga ilegal nga armas.
Nakuha sa ilang balay ang kalibre .22 nga rifle; usa ka kalibre .45 pistola; usa ka Automatic Rifle -15(AR-15); hand grenade; usa ka magazine sa kalibre .45; usa ka bala sa .9mm pistol; laing usa ka magazine sa kalibre .45 diin may sulod nga pito ka bala; 68 ka basiyo sa bala sa kalibre .45; 50 ka basiyo sa bala sa kalibre .9mm; ug ang tulo ka mga cellphones.
Si Police Captain Alejandro Batobalonos miingon nga ang Firearms and Explosive Division miingon nga adunay mga armas ang duha nga paso na ang mga lisensya.
May nadawat sab silang reports nga dunay private goons ang mga Arquillano.
Apan kusganon kining gihimakak sa duha. Ang mayor milimod nga iyaha ang mga armas ug granada gawas na lang sa .22 rifle nga iya sab gikwestyon kay 2010 pa kining nawala ug duna siyay sertipikasyon niini.
Apan matud ni Batobalonos nga walay pulos ang maong sertipikasyon kay ang .22 rifle diha nila nakuha sa balay sa mayor.
Ang hepe sa San Fransisco Police Station nga si Police Major Pedy Noval mibutyag sa Banat News nga niadtong Pebrero 9,2018 gi-Oplan Katok nila ang duha bahin sa expired na nga lisensya sa ilang mga armas .
Gitahan sa bise mayor ang iyang kalibre .380 pistol ‘for safekeeping’ samtang gihikay ang pag-renew sa lisensya niini.
Samtang ang mayor miduso og affidavit of loss sa iyang kalibre .22 nga rifle nga nawala niadto pang Marso 2010 apan gipabuhatan og affidavit of loss niadto lang Hulyo 26,2016.
Ang pangulo sa partido diin nasakop ang duha nagdudang politika ang motibo sa maong raid.
“We believe these are politically motivated to try and create a handicap on the support that the 5th district is giving the MAGPALE-DAVIDE candidacy. This unfortunate incident will not prevent or diminish the support of our allies. It will further strengthen and solidify our alliances,” matud ni Ace Durano, pangulo sa Barug Alang sa Kauswagan ug Demokrasya (BAKUD).
Ang abogado sa partido mitabang na kanila ni Arquillano bahin sa maong kaso. (Le Phyllis F. Antojado/IBM)(BANAT NEWS)
- Latest