Mga lungsod Tuburan ug San Fernando gi-downgrade

CEBU, Philippines —  Ang kalungsuran sa Tuburan ug San Fernando gipaubsan ang ilang kategoriya gikan sa red category ngadto sa orange gategory sa Election Watchlist Areas.

Kahinumduman nga sa inisyal nga listahan sa EWAS sa rehiyon siete niadtong buwan sa Pebrero, anaa ang maong duha ka lungsod sa red category.

Ang San Fernando giingong adunay taas ang political rivalry ug gisamotan kini dihang gibanhigan ang mayor sa maong lungsod nga si Mayor Lakambini ‘Neneth’ Reluya niadtong Enero.

Samtang ang Tuburan, nunot sa mga nasigpatan nga mga gikatahapang armadong grupo. Nunot niini, si Cebu Provincial Police Office director Police Colonel Manuel Javier Abrugena, nagkanayon nga nasuta sa gipahigayong pagtuon, mikunhod na ang political rivalry sa San Fernando samtang mikunhod sab ang mga nakitang gituohang Private Armed Groups (PAGS) sa Tuburan.  Hinungdan nga nadesisyonan sa mga sakop sa Joint Peace and Security Coordinating Council (JPSCC) nga bakwion ang red category niini. Gibutyag niini nga sa San Fernando, human nadakpan si Shielbert Michael Alerta Encabo mikunhod na ang away politika sa social media sa lungsod.

Kahinumduman nga niadtong Marso 19, si Encabo gidakop human maoy gitumbok nga nagpaluyo sa paghimo og drug list o kill list sa San Fernando

Miangkon sa mga sakop sa media si Encabo nga supporter siya sa kaatbang ni Mayor Reluya nga si Ruben Feliciano.

Nasayran nga naalarma ang mga opisyal sa maong lungsod sa seguridad sa ilang lugar nunot sa maong mikatap nga listahan sa mga patyonon diha sa social media.

Wala hinuon matumbok sa kapolisan nga si Feliciano ang nagpaluyo sa maong kill list.

Alang kang Abrugena, dakug purohan nga magmalinawon ang piniliay karong Mayo sanglit sa tanang nga munisipalidad sa lalawigan, 97 porsiyento na ang milangkub sa peace covenant signing.

Uban sa San Fernando ug Tuburan sa orange category ang mga lungsod sa Asturias, Daanbantyan, Ronda, Pinamungajan, ug San Francisco. Samtang anaa sa yellow code ang Pilar, Poro, Tudela; Dakbayan sa Danao, Dakbayan sa Bogo ug Dakbayan sa Carcar.  DILT (BANATNEWS)