Warden sa CCJ nihangyo og dugang supply sa tubig
CEBU, Philippines — Nagpadala og suwat ang jail warden sa Cebu City Jail male-dormitory Superintendent Renante Rubio kang Konsehal Dave Tumulak, chairman sa Committee on Public Order and Safety niadtong Marso 27, 2019 nga nagpahibawo sa kakuwang sa supply sa tubig sa ilang pasilidad.
Kini tungod sa pagkalit og saka sa gidaghanon sa inmates sa maong prisohan nga niabot na ngadto sa 5,721.
Nihangyo si Rubio nga ang pasilidad mahatagan og dugang supply sa tubig gikan sa Department of Public Services (DPS) aron pagtubag sa maong suliran.
Subay niini, si Tumulak nagkanayon nga gitubag na nila ang maong hangyo ug nakig-alayon ang siyudad sa Metropolitan Cebu Water District ug nagsige na sila og hatod og tubig diha sa city jail katulo sa usa ka semana.
Sa laing bahin, walay pagkulang sa supply sa tubig sa Cebu Provincial Detention and Rehabilitation Center (CPDRC) taliwala sa grabeng kainit nga nasinati sa Sugbo nga niresulta sa pagkunhod sa mga tinubdan sa tubig diha sa pipila ka lugar sa Dakbayan sa Sugbo.
Si Reynaldo Valmoria, warden sa CPDRC nagkanayon nga igo lang ang supply sa tubig alang sa kapin 3 mil ka priso sa provincial jail.
Walay natala usab nga sakit nga nikatap sa mga piniriso sa CPDRC diin gitumbok ni Valmoria ang pagkunhod sa populasyon sa mga inmate sa maong pasilidad.
Kaniadto 4 mil ang gidaghanon sa inmates sa CPDRC apan karon 3, 026 na lang. BDB (BANATNEWS)
- Latest