Managkapuyo gipatay
CEBU, Philippines – Patay ang managkapuyo nga gipamusil sulod sa ilang panimalay sa Sitio Lapyahan sa Barangay Labogon, Dakbayan sa Mandaue sa upat ka armadong mga lalaki nga pulos nagtaptap og panapton sa ilang nawong alas 2 pasado ang takna kagahapon sa kaadlawon.
Si Police Major Ramil Morpos nga maoy hepe sa Presinto 3 sa Mandaue City Police Office (MCPO) miila sa mga biktima nga mao sila si Ricardo Avenido, 38, ug kapuyo nga si Agnes Pogoy,36.
Matud pa ni Morpos nga nangatulog sa sulod sa ilang panimalay ang managkapuyo kauban sa tulo nila ka mga gagmay pa nga mga anak dihang gisaka sila sa upat ka armadong mga lalaki.
Sumala pa nga giguyod pa sa mga mamumuno ang duha palayo sa mga bata nga nangatulog ayha pa sila gipamusil sa makadaghang higayon nga nakaingon sa ilang hinanaling kamatayon.
Matud pa nga usa sa mga anak sa mga biktima ang nihangyo sa mga mamumuno nga dili lang iapil ang ilang inahan kay gagmay pa silang mga anak, apan wala sila paminawa.
Human sa pagpamusil nagdali pagpanggawas sa panimalay ug nanakay sa nagpaabot nga sakyanan nga gi-parking duol sa lugar ang mga mamumuno.
Si Police Corporal Matt Roco sa Presinto 3 miingon nga onse ka basiyo sa bala, ug mga deformed slugs ang nakuha sa crime scene. Matud ni Roco ang managkapuyo walay trabaho apan nagbaton kini og pito ka mga computers ug ingon man sakyanan .
Hinuon si Police Senior Master Sergeant Allain Carado sa MCPO miingon nga mitahan nai kaniadto sa ilang buhatan tungod sa paggamit og shabu kaniadto ang usa sa mga biktima. (Rowena Capistrano/IBM)(BANAT NEWS)
- Latest