Pag-uli sa sakyanan dili pamolitika?

CEBU, Philippines – Ang kamanduan nga gipirmahan ni Cebu City Mayor Tomas Osmeña alang kang Cambinocot Barangay Captain Rey Lauron nga ipauli ang city-owned vehicles walay bulok politika.

Si Ronaldo Malacora, pangulo sa Department of General Services (DGS) miingon nga ang kagamhanan mipatuman lang sa naunang mando niadtong Hulyo 18, 2016 nga nag-direkta sa Barangay Kapitan pag-uli sa city-owned vehicles.

Human sa issuance sa July 2016 order, giingong si Lauron pakyas sa pag-uli sa sakyanan nga maoy nag-aghat sa mayor nga mo-isyu og laing order penetsahan og Marso 11, 2019. Ang maong mga sakyanan naglangkub sa Toyota Hi-Ace Commuter Ambulance, Rescue Patrol Mazda Bongo ug Mitsubishi L300. Sa pagkutlo ning maong balita nauli ni Lauron ang ambulansiya ug L300 gani ang ambulansiya gibalik na usab sa barangay samtang ang L300 anaa sa warehouse sa DGS sa South Road Properties (SRP).

Maghuwat pa si Malacora sa order gikan sa mayor kon ibalik ba o dili ang L300 unit sa maong barangay.

Dili sab kini makahatag og tubag kon ngano nga ang city government mi-implementar sa order ug nibalik ra sab sa sakyanan.

Gisuwayan og tawag sa Banat News si Kapitan Lauron apan wala kini motubag. (/DILT)(BANAT NEWS)