Managkapuyo gi-Ambush

CEBU, Philippines — Wa nay kinabuhi ang managkapuyo nga kalit lang gipamusil samtang luwan sa ilang motorsiklo gikan ang duha nag-inom sa usa ka bar diha sa Rabaya St., Sitio Matinagdanon, Barangay Tabunok, Dakbayan sa Talisay kagahapon sa alas 4 sa kaadlawon.

Ang mga biktima nailhan nga sila si Felix Yares, 30, taga Barangay Poblacion sa maong dakbayan ug ang iyang hinigugma nga si Carol Dixie Bacalso, 28, taga Barangay Tanke sa maong  siyudad.

Si Chief Insp. Ardeolito Cabagnot, deputy chief sa Talisay City Police Station nagkanayon nga gikan sa Cebu Planet Restobar ang mga biktima.

Luwan sila og motorsiklo padung na pauli dihang kalit silang gitaparan og usa ka motor nga may duha ka lalaking sakay niini ug gipauwanan sila og bala hinungdan sa ilang pagkahagba sa dalan samtang mipasirit palayo ang mga mamumuno.

Ang mga sakop sa Talisay Rescue Emergency Team (TREAT) nga pinanguluhan ni Rhon Acebron nisuway sa pagtabang sa mga biktima apan nakabsan ra gyud sila sa ilang kinabuhi.

Ang mga nirespondeng polis nakakuha og unom ka basiyo sa bala sa kalibre .45; tulo ka bala sa .45 nga wala makabuto ug usa ka deformed slug sa wa pa matino nga kalibre.

Duha ka motibo ang gitutokan sa pagpatay sa managkapuyo matud pang Cabagnot.

Una nilang gitan-aw ang report nga adunay nakalalis si Yares sa maong bar niadtong miaging mga adlaw kabahin sa cellphone nga nawagtang giingong duna siyay nakulatahan anang tungora tungod sa iyang kasuko.

Samtang ang ikaduhang motibo nga ilang gitan-aw mao ang impormasyon nga nalambigit si Bacalso sa ilegal nga drugas. Ug usa kini ang gidudahang hinungdan sa kalit nga pagasenso sa duha.

Sa wala pa sila gipatay nakit-an pa sa mga higala ni Yares ang iyang pagkanta-kanta nga gi-live niini sa  Facebook. Wa sila mahibawo nga mao na diay kadto ang katapusan nila nga paggamit sa social media. Ang kapolisan padayon pang nisusi sa duha ka motibo lakip sab ang uban pa nga ila unyang mahibaw-an sa nagpadayon nila nga imbestigasyon. (/IBM)(BANATNEWS)