11 bata naluwas, 5 traffickers sikop
CEBU, Philippines — Lima ka mga suspek sa online trafficking ang nadakpan samtang onse ka mga bata ang naluwas sa tulo ka dungan nga operasyon sa mga otoridad niadtong Huwebes sa hapon diha sa Dakbayan sa Lapu-Lapu. Ang mga gipasanginlang traffickers nagpangidaron og 20 ngadto sa 30-anyos kansang mga pangalan gitago sa Banat News aron maprotektahan ang mga batang na-rescue nga ilaha rang mga kadugo.
Duha ka balay ang gironda sa kapolisan pinangulohan sa PNP Women and Children Protection Center –Visayas Field Unit. Ang mga naluwas nag-edad pa lang og 2 anyos hangtud edad 12 anyos. Ang lima ka dinakpan pulos mga babaye gikatahong nibugaw sa maong mga bata ug gi live streaming pinaagi sa internet. Sa pikas linya nagtan-aw ang mga langyaw nga nagbayad kanila.
Matud pa ni Atty. John Tanagho, ang tulo ka operasyon pagpakita sa kalig-on sa panagtinabangay sa WCPC Visayas, DSWD-7, IACAT-7 ug Lapu-Lapu City police aron mahunong kining mga nalambigit sa online trafficking nga ang biktimahon mga bata.
Ang naluwas gilangkoban og siyam ka babaye ug duha ka lalaki ug anaa na sila karon sa Department of Social Welfare and Development alang sa trauma-informed interventions.
Si WCPC-VFU Chief Romeo Perigo, nitug-an padayon ang operasyon batok sa uban pang mga nalambigit niini.
Niadtong adlaw nga Huwebes, nakombikto sa korte ug gisilotang mabilanggo ang usa ka 25 anyos nga mama nga taga Cordova tungod sa pagbugaw sa iyang duha ka anak ngadto sa mga langyaw pinaagi sa online trafficking.( /IBM) (BANATNEWS)
- Latest