Walay tanod patabangon inig eleksyon

CEBU, Philippines – Ang Mandaue City Police Office (MCPO) dili mosampit og tabang ngadto sa mga barangay tanod alang sa pagpatunhay sa kahapsay ug kalinaw sa adlaw mismo sa piniliay karong Mayo 13.

Si MCPO director Julian Entoma mipadayag niini kay dili kalikayan matud pa nga ang mga barangay tanod adunay dapigan nga mga kandidato hinungdan nga  maglisod sila sa pagtuman sa ilang responsibilidad sa pagbantay sa kahapsay ug kalinaw. Gitataw ni Entoma nga giila na nila ang mga barangay sa dakbayan nga ilang hatagan og pasiuna nga pagtagad tungod sa kadaghan sa narehistro nga mga botante.

Ilang nasuta nga sa 27 ka barangay sa Siyudad sa Mandaue, 21 niini ang adunay kapin sa singko mil ug kapin sa tres mil ka mga botante nga maoy hatagan nila og higpit nga pagbantay sa umaabot nga piniliay.

Niadtong 2016 elections, ang Commission on Elections (Comelec) mipaubos sa Dakbayan sa Mandaue sa green code nga nagpasabot kini nga walay angay nga kabalak-an panahon sa piniliay.

Apan niining tuiga, ang Comelec mipaubos sa Mandaue sa kategorya nga yellow code nga nagpasabot nga adunay mainiton nga panag-atbang sa mga kandidato sa dakbayan. (/DILT) (BANAT NEWS)