Nag-inom gidunggab

CEBU, Philippines – Nakaangkon og samad dinunggaban ang usa ka lalaki nga nag-inom human kini dunggaba sa laing lalaki nga tabis og tinan-awan kaniya kagahapon sa kadlawon diha sa Sitio Sangi, Barangay Tabunok, Dakbayan sa Talisay.

Ang biktima mao si Christian Lou Abaya, 28-anyos, nagpuyo sa maong lugar.

Sa imbistigasyon sa kapolisan nasuta nga nag-inom ang biktima uban sa iyang mga higala.

Apan taud-taud na nga nabantayan sa biktima ang wala ilhing lalaki nga nagsige og tan-aw kaniya.

Wala lang niya kini gipanumbalinga apan nakadesider si Abaya sa pagsita sa maong lalaki nga tabis kaniya og tinan-awan.

Giduol ug gipangutana ni Abaya ang maong lalaki apan nibunot kini og ice pick ug dayon dunggab kaniya.

Maayo gani kay natapi ni Abaya ang mga dunggab ug nakaangkon lang siya og mga samad dinunggaban sa iyang wala ug tuo nga pulso.

Ang nanunggab dali kini nisibat samtang ang biktima gidala diha sa Talisay City District Hospital sa iyang mga kauban. (/BDB)(BANAT NEWS)