Honorarium sa EBs direkta na nilang madawat
CEBU, Philippines — Ang honorarium sa mga magtutudlo nga magsilbing electoral board sa umaabot nga eleksiyon ideretso na kining madawat kanila o dili na ipaagi og cash card. Gitug-an ni Atty. Jerome Brillantes, acting provincial election supervisor nga nadesisyonan sa Comelec nga dili na ipaagi sa cash card ang honorariums sa EBs aron nga dali ang pag apod-apod niini ug dili masusama sa niaging mga eleksiyon.
Matud ni Brillantes nga pipila ka adlaw o usa ka semana human sa piniliay madawat na dayon sa EBs ang ilang honorarium.
Si Dr. Rhea Mhar Angtud, provincial school’s division superintendent sa Department of Education (DepEd) Cebu Province nihangop sa maong development sa Comelec.
“Mas convenient sa teachers’ nga on hand cash ang paagi, daghan baya to issue ang cash card. Dili ma open, dili mogana, then sa Manila man gikan ang card dugay mailisan, so nindot nga paagi na”, matud ni Angtud.
Ang mga electoral board makadawat kini og P2, 000 ngadto sa P6, 000 nga honorarium depende sa position niini sa umaabot nga eleksiyon.
Sa pagkakaron padayon ang gihimong training sa Comelec ngadto sa mga electoral board kalabot sa trabaho niini sa umaabot nga May 13 midterm election. (BANAT NEWS)
- Latest
