Uyab nga polis sa shabu queen nag-AWOL

CEBU, Philippines – Usa ka polis nga nag absence without official leave(AWOL) sa Police Regional Office-7 headquarters ang giingong karelasyon sa gibansagang Cebu drug queen nga nadakpan didto sa lungsod sa Consolacion sumala pa sa opisyal sa kapolisan.

Si Police Brigadier General Debold Sinas sa press conference kagahapon nagkanayon nga dihang nadakpan si Jocelyn Encila niadtong nakalabay nga semana ug nakuhaan og napulo ka kilong gidudahang shabu.

Wala hinuon ibutyag ang pangalan sa maong nag AWOL nga polis subay sa hangyo sa PRO-7 samtang naghimo pa sila og imbestigasyon. Gitug-an ni Sinas nga nagduda gyud silang daan nga adunay polis nga kakunsabo ang grupo ni Encila.

Sumala pa sa PRO-7 Intelligence Division Chief, Police Colonel Remos  Medina gitun-an nila karon ang pagpasaka og kasong administratiba nga neglect of duty batok sa maong polis.

Maghimo pa sila og mas lawom nga imbestigasyon ug balidasyon kun nalambigit ba gyud sa negosyo sa ilegal nga drugas ni Encila ang maong polis.

“Posible na may tinatago siya, bakit bigla siyang mawawala if wala siyang kasalanan?,” matud pang Medina.

Sa laing kalamboan sa maong kaso, si Sinas miingon nga ang igsuon ni Jocelyan nga si Janilyn kinsa gipatay sa wala mailhing mamumuno niadtong Miyerkules sa gabii sa Mandaue City miingon nga ang nagpatay niini mga sakop sa sindikato sa ilegal nga drugas aron dili kini makahatag og mga impormasyon ngadto sa kapolisan.

“Nahadlok sila maabot namo si Janelyn , makuhaan namo information so gikuha na lang. Wala gani mi kahibaw naa siya sa Mandaue. So it’s very sad nahitabo,” sigung pang Sinas.

Matud ni Sinas nagsugod ang duha sa Mandaue City niadtong 2017. Sila maoy gitumbok nga bodegera sa mga shabu gikan sa Rustico Ygot drug group. Si Ygot giingong karelasyon ni Jocelyn ug naa na karon sa New Bilibid Prisons.

Si Jocelyn nadiskubrehan human nadakpan sa mga sakop sa Cebu City Police Office si Elymar Ancajas niadtong Marso 3 ning tuiga. Si Ancajas mitug-an sa kapolisan nga kang Jocelyn gikan ang 18 ka kilong shabu nga nakuha gikan kaniya.

Sa pagronda sa balay ni Jocelyn nakuhaan kini og napulo ka kilong shabu ug gidakop ang iyang mga ginikanan.  Miabot og P190 milyones ang kantidad sa shabu nga nakuha gikan kang Ancajas ug Jocelyn nianang gabhiuna. (/IBM)(BANAT NEWS)