Bus ug SUV nagsungag
CEBU, Philippines – Misampak sa bus ang usa ka SUV human kini misaka sa gutter sa may Cebu South Coastal Road habig sa Sitio Isla Verde, Brgy. Lawaan II, Dakbayan sa Talisay kagahapon sa udto.
Nunot sa maong hitabo, gidala sa tambalanan ang drayber sa SUV nga si Brent Gonzales nga taga Lungsod sa Minglanilla.
Samtang gikustodiya sa kapolisan ang drayber sa Ceres bus nga si Roldan Sencio nga taga Lungsod sa Carmen.
Matud ni PO1 Dino Salazar sa Talisay City Traffic Division nga gikan sa Cebu City si Gonzales ug paingon sa habagatang bahin.
Pag-abot sa nahisgutang lugar, misaka sa gutter ang SUV dayon bangga sa bus nga paingon sa Siyudad sa Sugbo.
Ang mga nakasaksi mitug-an nga nadaro gyud sa bus ang SUV hinungdan sa maayo niining pagkapiyapi sa atubangan niini.
Gibana-banang miabot sa 12 ka pasahero ang sakay sa maong bus nga adunay rota nga Dalaguete.
Gidala sa Talisay City District Hospital si Gonzales nga nakaangkon og mga bun-og sa kalawasan.
Dugang ni PO1 Salazar nga adunay pipila ka pasahero ang nakaangkon og mga garas gumikan sa pagkabuak sa mga samin sa maong bus. Hinuon wala ray mga nagrabehan sa maong hitabo. (/DILT)(BANAT NEWS)
- Latest