2,000 manglimpyo sa kasapaan

CEBU, Philippines – Moabot ngadto sa 2,000 ka mga volunteers ang gilauman nga moapil sa clean-up drive sa tulo ka dagkong sapa sa syudad sa Sugbu nga naglakip sa Bulacao, Lahug ug Guadalupe river.

Ang pangulo sa Cebu City Environment and Natural Resources Office(CCENRO) nga si Nida Cabrera miingon nga ang 2,000 base sa numero sa mga volunteers nga mipakita og interest nga mosalmot sa clean-up drive.

Si Cabrera nagkanayon nga ang 'information dissemination' labot sa clean-up nakatabang og dako aron pag-awhag sa mga interesadong indibidwal nga moapil. Sigon niini, nagkalain-laing government agencies ang mitabang sa kagamhanan sa pag-imbitar og mga volunteers inabagan pa sa pag-post ni Mayor Tomas Osmeña sa iyahang official Facebook page labot sa maong kalihukan. Sagad sa mga volunteers gikan sa mga business establishments, civic organizations ug Business Process Outsourcing.

Dugang ni Cabrera nga sa matag clean up, ang mga volunteers magdala og boots, gloves ug ubang gamit sa pagpanglimpyo.

Karong Pebrero 23, adlaw’ng Sabado mahitabo ang clean up drive sa Bulacao river, sa Marso 9 limpyuhan ang Lahug river ug Marso 16 ang Guadalupe river. —/LPM (BANAT NEWS)