Ultimatum sa SITG-Reluya gilibkas

CEBU, Philippines — Gibakwi na ni Chief PNP Oscar Albayalde ang ultimatum nga gihatag sa Special Investigation Task Group-Reluya human nakita ang kalamboan sa imbestigasyon.

"I discussed to chief PNP and he was happy and satisfied ang instructions niya is to push thru and gukdon gyud ‘tong duha ka na identified," Matud ni Police Regional Office-7 director Chief Supt. Debold Sinas.

Kahinumduman nga gihatagan ni Albayalde og ultimatum nga duha ka semana ang PRO-7 sa pagsulbad sa pagpamanhig sa grupo ni San Fernando Mayor Lakambini Reluya ug iyang bana nga si Association of Barangay Councils President Ricardo "Nonoy" Reluya Jr. ug upat ka mga staff didto sa Barangay Linao, Dakbayan sa Talisay niadtong Enero 22. Naluwas ang mayor ug laing duha ka mga staff apan si Ricardo, ug   drayber nila nga si Allan Bayot ug ang staff sa mayor nga si Ricky Monterona nangamatay sa maong ambush.

Gitumbok sa Special Investigation Task Group-Reluya si Jerome Labitad ug Felix Abacajan Jr. nga padayon pang gipangita.

Nanawagan si Sinas niadtong adunay nahibaw-an o nakasaksi sa krimen nga makig-alayon sa polis alang sa kalamboan sa imbestigasyon. Mamahimong mo text sa hepe sa San Fernando nga si Police Chief Inspector Lymel Pasquin sa numerong  0917 720 9843.( /IBM)(BANATNEWS)