E-Jeeps nangabot na sa Lapu-Lapu

CEBU, Philippines — Nahidangat na ang 25 ka mga Electric Jeep  (E-Jeep) sa Dakbayan sa Lapu-Lapu nga maoy kabahin sa 100 ka mga units nga padaganon sa tanang rota nga motadlas sa mga kabarangayan sa mainland sa maong dakbayan.

Gikan sa Las Piñas City sa kaulohan ang maong mga  E-Jeeps kun asa nahimutang ang buhatan sa Star 8  Green Technology Corporation ang supplier sa maong matang nga mga sakyanan nga giingong environmental friendly nga mihaum usab sa panginahanglan ubos sa transportation modernization program sa kagamhanan.

Sa nasayran nga unang naabot kagahapon ang napulo ka mga units niini ug dugang 15 ka units ang moabot karong adlawa.  Unahon ang 25 ka units sa pagpadagan alang sa pagpamasahero sa higayon nga makumpleto na ang ubang kagamitan niini.

Ang mga sakop  sa UTDOCO  nga maoy mag-operate sa E-Jeeps nanginahanglan karon og 250 ka mga nabansay na nga mga drayber alang sa 100 ka units.

Si Mayor Paz  Radaza  nga mihangop sa maong mga sakyanan miingon nga ang pagdagan niini palibot sa dakbayan makahatag og kasulbaran dili lang sa kalisod sa pagsakay sa mga lumolupyo lakip na niini ang pagpanalipod sa kalikupan. Walay kausaban ang minimum nga pletehan niini kay magpabilin nga otso pesos apan ang dakung bintaha sa mga pasahero mao ang ilang paglingkod nga hamugaway gikan sa ilang pagsakay hangtud na unya sa ilang pagkanaug. (/DILT)(BANATNEWS)