Footage sa dash cam napapas
CEBU, Philippines — Anak sa gipatay nga piskal mitingog na kahahapon sa sa DyHP ug nipasangil nga gikakurat nila kun nganong napapas ang footages sa dashcam sa sakyanan sa iyang inahan nga gibanghigan niadtong Enero 17,2019 sa dalan sa Escario sa Barangay Camputhaw sa Dakbayan sa Sugbo.
Ang Anak ni kanhi Cebu City Prosecutor Mary Ann Castro nga si Annamel Monique Castro Roa mitug-an ngay nahibulong siya kun nganong napapas na ang footages sa dashboard camera sa pribadong sakyanan sa iyang inahan.
Si Roa mibista sa dyHP kauban sa inahan ni Castro nga si Helen Castro gahapon sa buntag.
Mitataw si Roa nga katorse na ka adlaw ang milabay apan blangko pa gihapon ang imbestigasyon kun unsay motibo sa pagpatay sa iyang inahan.
"We don't want to ascribe blame, but it is really curious kay everything from January 17 and prior January 17, wala na gyud siya sa dashcam. When in fact we know nga mag record man gyud na siya’g mag dagan siya. Dako gyud siyang katingalahan," matud pa ni Roa.
Si Roa miasoy sab nga adunay mensahe sa cellular phone sa iyang inahan apan wala siya’y nabasahang hulga kung duna man.
"Wala man tay indications if nahilabtan ba ang cellphone. We of course, would not ascribe motives to any one kay wala man sad mi masulti kung kinsa bay mobuhat ana niya," dugang pa ni Roa.
Si Roa miingon nga modanghop sila sa National Bureau of Investigation o NBI aron magpatabang sa nahitabo sa inahanb. Nanawagan sab ang pamilya Castro nga tutukan ang tanang angulo sa imbestigasyon.
Si Castro gikan sa usa ka kan-anan ug padung na pauli sakay sa iyang sakyanan sa dihang pagabot sa dalan Escario kalit kining gipaulanan og bala sa lalaking nagmotorsiklo. Patay dihadiha ang piskal.
Si Police Chief Inspector Sanchez mikumpirmar sab nga personal nga mibisita kanila si Roa apan nagdumili kini paghatag og impormasyon kun unsa ilang nahisgutan. (/IBM)(BANATNEWS)
- Latest
