COMELEC: Dugang checkpoints gikinahanglan
CEBU, Philippines – Giawhag sa Commission on Elections (Comelec) ang kapolisan nga dugangan pa ang paghimo og police checkpoints dinhi sa Sugbo karon election period nunot usab sa nagkadaghang mga kaso sa mga pagpamusil ug pagpatay sa nangaging mga adlaw.
Niadtong miaging gabii, patay ang usa ka delivery truck driver nga si Judy Luzano,39, human kini gipusil sa riding in tandem diha sa Sitio Abuno sa Barangay Pajac, Dakbayan sa Lapu-Lapu niadtong Biyernes sa buntag.
Si Police Officer 2 Marvin Saraum sa Homicide Section sa Lapu-Lapu City Police Office (LLCPO) miingon nga naghatud og dressed chicken ang biktima kauban ang duha ka helper sa dihang kalit naabot ang mga mamumuno ug gipusil kini. Gituohan nga ang biktima lamang maoy tuyo sa mga kriminal sanglit wala hilabti ang mga kauban niini. Gisusi sa kapolisan ang report nga dunay nadunggaban kaniadto ang namatay.
Ang ingon niini nga mga hitabo maoy gusto sa Comelec nga mapakgang ilabi na nga election period na karon.
Si Atty. Jerome Brillantes ang acting provincial election supervisor sa Sugbo nagkanayon nga epektibong pangsanta sa krimen ang checkpoints apan giangkon niya nga dili tanan mabantayan sa mga polis.
Niangkon si Brillantes nga “concerned” sila sa sunodsunod nga pagpatay, sama na lang sa mga gipamatay nga opisyales sa Lungsod sa San Fernado.
Giawhag ni Brillantes ang kapolisan sa probinsya nga padaghanon pa ang checkpoints sa usa ka area o lungsod aron di na kini masubli pa. Si Brillantes nagkanayon nga ilang i-revaluate ang kadtong mga munisipyo o lungsod nga apil sa Election Watchlist Areas (EWAS) aron matino kun dugangan ang pwersa sa kapolisan. (Romeo Limpangog/IBM)(BANAT NEWS)
- Latest