Habalhabal drivers makadawat og bugas

CEBU, Philippines — Ang tanang qualified Angkas ug motorcycles-for-hire drivers hayan makadawat gyud og usa ka sakong bugas gikan sa Cebu City Government.

Niadtong Enero 15, si Mayor Tomas Osmeña mipagawas og Executive Order No. 45 nga nagtinguha pagtabang sa tanang kwalipikadong habalhabal drivers ug ang ilang pamilya pinaagi sa paghatag og rice subsidy.

Mihimo sa maong inisyatibo ang mayor subay sa pagsuspenso sa Korte Suprema sa operasyon sa Angkas lukop nasud.

“Cebu City Government intends to provide financial and economic support to this displaced public transportation sector to help alleviate the distressed and poor situation of the indigent “habalhabal” drivers and their families”, tipik sa EO.

Sa wala pa mihimo ang mayor sa maong order, ang City Legal Office miisyu og legal opinion nga naglatid nga ang pag-draft og EO “within the scope of powers of the City Mayor and of the Sanggunian”.

Ang mayor mi-set sab og qualifications nga nakalatid ubos sa order diin adunay mga resikitos nga angay nilang tumanon ug isumitir sa Mayor’s Office.

Ang maong final list maoy basehanan sa distribusyon sa usa ka sakong bugas  matag habalhabal drivers.

Sa pagkutlo ning maong balita ang city government mo-procure pa og 10 mil ka sakong bugas pinaagi sa public bidding nga himuon ugmang adlawa.

Nasayran nga gamiton nila ang P15 million nga approved budget sa konseho gi-charged sa Philippine Amusement and Gaming Corporation (PAGCOR) funds. (BANAT NEWS)