Lima ka private company mudala sa Minglanilla landfill

CEBU, Philippines — Lima ka mga pribadong kompaniya maoy mudumala sa himuong landfill, ang nangindahay nga muhatag na og pagtugot ang kagamhanan sa lungsod sa Minglanilla nga makasugod na sila sa ilang operasyon.

Kini human naobserbaran sa mga opisyales nga gasto kaayo ang ilang kasamtangan pagkolekta sa basura.

Si Concordio Mejias, municipal administrator sa maong lungsod nagkanayon nga nagkadaghan ang basura sa ilang lugar hinungdan nga nagkadako sab ang ilang bayranan sa pribadong kompaniya nga mukolekta sa ilang mga basura.

Ang Minglanilla magbayad og usa ka milyon ka pesos matag buwan sa pribadong kompaniya nga maoy nikolekta sa ilang mga basura.

Asoy pa ni Mejias nga ang lima ka kompaniya nga mudala sa landfill nihatag na sa ilang mga proposal kun diin makadaginot gyud ang lungsod niini ug gawas pa makaangkon na gyud sila og landfill nga kaugalingon.

Siya nitataw nga imbes ang ilang ibayad sa kasamtangan karon nga tigkolekta sa basura adto na nila magahin sa ubang mga serbisyo alang sa ilang mga konstituwenti.

Ang Minglanilla makahipos og 40 ka toneladang basura matag buwan sud sa 19 ka barangay.

Gipanglantawan nga diha sa Barangay Guindaruhan ug Cadulawan ibutang ang landfill.

Sa pagkakaron, gihashasan pa sa konseho ang mga proposal sa lima ka pribadong kompaniya nga mudumala sa landfill.

Usa sa ilang gipaabot nga kining lima ka kompaniya makakuha ba sab og pagtugot gikan sa Department of Environment and Natural Resources (DENR), EMB ug sa Provincial Environment and Natural Resources Office (PENRO).  LPM, (BANAT NEWS)