Engkwentro sa buy-bust, usa patay

CEBU, Philippines — Patay ang usa ka gipasanginlang drug pusher human giingong nakigpinusilay sa mga polis sa Lungsod sa San Fernando niadtong Lunes sa alas 8 sa gabii diha sa Purok Acacia, Barangay San Isidro, pipila lang ka adlaw human girelibohan ang tibuok pwersa sa kapolisan sa maong lungsod.

Ang namatay nailhan nga si Russel Generalao, nagpuyo sa maong dapit.

Ang mga bag-ong nadestino nga mga polis sa maong lunsgod pinanguluhan ni Chief Insp. Lymel John Pasquin nihimo dayon og operasyon human sila nakadawat sa impormasyon sa ilegal nga kalihukan ni Generalao.

Wala usab makamatikod ang suspek nga polis diay ang iyang kasabot nga mopalit og ilegal nga drugas gikan kaniya mao nga nahitabo gyud ang buybust.

Apan wala magdugay nagduda dayon kini nga polis ang iyang kaatubang ug gikatahong nibunot dayon kini sa iyang armas ug namusil. Wala siya’y naigo sanglit dali nga nakatago ang mga operatiba ug nakahigayon sa pagbawos pagpusil ni Generalao.

Naigo sa nagkadaiyang parte sa iyang lawas si Generalao hinungdan sa iyang kamatayon.

Nakuha sa kapulisan ang armas nga .45 ug mga shabu nga gidiretso nila og hatag sa PNP Crime Laboratory alang sa eksaminiasyon.

Ang maong operasyon nga niresulta sa pagkamatay sa subject maoy una sa mga bag-ong polis nga nadestino sa maong lungsod human nga ang kaniadto mga polis sa lungsod gihulagway ni PRO-7 Director Debols Sinas nga nagmika sa ilang trabaho ilabi na sa kampanya kontra ilegal nga drugas.  IBM, (BANAT NEWS)