Pillbox mibuto duol sa balay sa opisyal sa Port Police

CEBU, Philippines — Usa ka gituohang pillbox nga eksplosibo ang miulbo sa gawas nga bahin sa panimalay sa usa ka opisyal sa Port Police  diha sa dalan F.Llamas, Barangay Basak-San Nicolas, Dakbayan sa Sugbo kagahapon sa kaadlawon.

Ang tagiya sa maong panimalay giila mga si Port Police Inspector Vincent Jo Castrodes giingong nadestino sa Law Enforcement Branch sa Philippine Ports Authority.

Sa report sa Cebu City Police Office, nakadungog og boto ang silingan sa maong opisyal apan wala nila kini panumbalinga kay nagtuo kini nga usa lang kini ka pabuto.

Apan sa pagsusi sa katabang ni Castrodes, nadiskubrehan ang pipila ka mga fragment sa gituohang pill box.

Matud pa sa CCPO nga sa pagkakaron personal grudge ang gitutokan sa maong imbestigasyon sanglit adunay nakabangi si Castrodes sa trabahoan kaniadto.

Giingong gipasanginlan si Castrodes nga maoy nagduot sa pagpadali sa suspensyon sa iyang labaw niadtong Agosto sa miaging tuig.

Gisuwayan sa Banat News sa pagtawag sa hepe sa Mambaling police station kabahin sa estado sa ilang imbestigasyon apan dili na kini motubag. (BANAT NEWS)