Napatay pag-serve sa warrant

CEBU, Philippines —  Usa patay sa engkwentro atol sa pagsilbi sa kapolisan og warrant of arrest may labot sa kaso sa ilegal nga drugas diha sa Sitio Canapnapan, Barangay Campo 8 sa Dakbayan sa Toledo kagahapon sa kaadlawon.

Ang nakalas giila nga si Remegio Caballero Atelio, 53, taga Campo 4, Dakbayan sa Talisay, nga giingong kakunsabo sa drug Lord nga si Jerome Labitad. Samtang giapil sab og dakop ang nagpapuyo kaniya sa Toledo nga si Teodolo Juarez Insiso, 36, nga gikatahong drug courier sab ni Labitad.

Base sa report sa kapolisan, nakuha gikan sa maong lugar ang gipangtuohang gigamit nga mga armas ni Atelio: usa ka M16 rifle nga adunay upat ka mga magazine ug mga bala; duha ka mga kalibre .45; usa ka KG9; ug assorted nga mga bala sa kalibre .9mm ug .45. Giingong napalgan sa mga operatiba ang lima ka medium ug 25 ka mga gagmay’ng pakete nga may sud nga gituohang shabu sulod sa bulsa sa napatay nga si Atelio.

Ang direktor sa Cebu Provincial Police Office nga si Senior Supt. Manuel Javier Abrugena mibutyag sa Banat News nga si Atelio ang subject sa warrant of arrest sa kaso sa ilegal nga drugas nga bitbit sa kapolisan. Apan sa dihang nagpaila nga mga polis ang nagsilbi sa warrant, giingong nagpabuto dayon si Atelio. Hinungdan nga mibawos ang pwersa sa kapolisan.

Si Atelio nakigpinusilay sa pwersa sa Provincial Intelligence Branch, Special Weapons And Tactics sa CPPO, Provincial Mobile Force Battalion; Toledo Police sud sa pipila ka minutos.

Pagtin-aw ni Abrugena nga dili pa sila sigurado kun niapil ba sab og pamusil si Insiso apan gidakop gihapon nila kini sa sala nga gitagoan niya sa iyang balay ang maong suspetsado.

"Alam naman po niya na hinahanap siya (si Atelio) sa batas pero pinatira pa rin niya," sigun ni Abrugena. Ipaubos sa paraffin test ang maong dinakpan.

Butyag sa maong direktor nga gawas sa kalambigitan ni Atelio sa drugas, nalambigit sab kini sa pagpangawat ug gun-for-hire.

Ipaubos ni Abrugena ang mga nakuhang armas sa ballistic examination aron masuta kun nagamit ba kini sa mga krimen sa probinsya sa Sugbo ilabi na sa Dakbayan sa Talisay diin kaniadto nag-operate.   IBM (BANATNEWS)