Walay special treatment sa mga politiko–Garma

CEBU, Philippines – Ang mga politiko nga motambong sa mga kalihukan kalabot sa Sinulog o kapistahan ni Senior Santo Niño dili kini hatagan og special treatment matud sa kadagkuan sa kapolisan ug simbahan.

Si Senior Superintendent Royina Garma, city director sa Cebu City Police Office nipadayag nga walay special treatment nga ihatag ngadto sa mga politiko.

Ang mga politiko kinahanglang adto kini mosulod sa mga entrance gate ug wala usab silay reservation sa mga lingkuranan diin kong kinsay unang moabot mao usab ang unang makalingkod.

Matud ni Garma nga ang mga pari nga moapil sa Santos nga Misa ang makahimo sa pagsulod diha sa exit area tungod kay aduna silay ihatag niini nga clearance aron dili kini sila matanggong sa daghan kaayong tawo.

Si Garma nipasabot nga sa pagkakaron wala silay special treatment nga ihatag tungod kay kong ilaha kining buhaton daghan ang mosunod ug maguba ang ilang mga plano.

Si Garma nagkanayon nga ang mga politiko kinahanglang mosunod kini sa balaod nga ilang ipatuman.

Gibutyag ni Garma nga nakadawat sila og kamanduan gikan sa direktor sa Police Regional Office (PRO)-7 Chief Superintendent Debold Sinas nga dili mohatag og special treatment kang bisan kinsa.

Samtang si Reverend Father Aladdin Luzon, OSA chairman sa safety, security peace and order nanawagan sa tanang mga politiko nga dili gamiton ang kapistahan ni Senior Santo Niño sa ilang mga political ambition.

Awhag ni Luzon ngadto sa mga politiko nga makig-uban ug makigsandurot lang sa mga ordinaryo nga debotos ug mosunod sa nalatid sa balaod alang sa kapistahan tungod kay wala silay special treatment nga ihatag. (/BDB)(BANAT NEWS)