Petisyon sa usbaw sa suholan gibasura sa RTWPB

CEBU, Philippines – Gibasura sa Regional Tripartite Wages and Productivity Board-7 ang petisyon nga P150 matag adlaw nga usbaw sa suholan sa mga mamumuo sa Central Visayas.

Matud ni Jose Tomongha, usa sa mga duha ka representante sa labor ngadto sa wage board nga gibasura ang petisyon human ang mga representante sa gobiyerno ug management dili kombinsido nga adunay "supervening conditions" aron adunay merito nga tagdon sa board ang maong petisyon.

Ang tulo ka government representatives gikan sa Department of Labor and Employment, National Economic Development Authority ug Department of Trade and Industry.

Si Metudio Belarmino, tigpamaba sa lima ka petitioners nipadayag sa ilang kasagmuyo sa desisyon sa wage board diin alang kanila adunay supervening conditions.

Matud ni Belarmino nga mopasaka sila og laing petisyon sa mosunod nga mga adlaw.

Samtang si Tomongha nagkanayon nga siya ug ang laing labor representative kombinsido nga adunay supervening conditions kini bisan pa sa pag-ubos sa presyo sa lana niadtong buwan sa Disyembre.

Ang maong petisyon giingong pwede kining tagdon sa wage board kong aduna silay makita nga supervening conditions sama sa pagsaka sa presyo sa lana, pagsaka sa presyo sa nag-unang palaliton, ang inflation rate og uban pa.

Niadtong Agosto 3, 2018 ang kataposang pagsaka sa suholan sa mga mamumuo sa Central Visayas.

Ang mga wage hike petitioner gilangkuban sa Cebu Labor Coalition, Lonbisco Employees Organization, Nagkaisang Lakas ng Manggagawa-Katipunan, Metaphil Workers Union ug Unionbank Employees Association. (/BDB)(BANAT NEWS)