May warrant, kauban patay

CEBU, Philippines – Duha ang patay sa pinusilay sa pag-implementar og warrant of arrest sa kapolisan sa Yellow Ville, Barangay San Jose sa Lungsod sa Poro, Camotes tungang gabii sa miaging Biyernes.

Ang operasyon gipanguluhan sa Cebu Provincial Police Office Provincial Intelligence Branch Drug Enforcement Unit pinaagi ni Senior Inspector Alejandro Batobalonos.

Ang mga namatay nailhan sa ngalan nga Perlito Baguio Brion Jr., 32, molupyo sa Barangay Dumlog, Talisay City. Usa siya ka high-value target nga wanted sa pagpamaligya og ilegal nga drugas, siya pud ang subject sa warrant of arrest.

Nailhan nga idlas si Brion mao kadaghan na siyang gisuwayan pagsikop apan kanunay nga makaikyas.

Aduna lang sila nadawat nga impormasyon nga kini nagpuyo na sa mansion sa Camotes.

Sumala pa ni Batobalonos mag-ulian gihapon si Brion sa Talisay gamit ang barge aron masakay pud ang awto niini.

Ang iyang kauban nga napatay sab mao ang iyang personal driver nga si Floriano Manal Mag-aso, 60, gikan sa San Nicolas, Cebu City.

Sigon pa ni Batobalonos sa phone interview sa Banat News nikalit og pabuto ngadto kanila si Brion gamit ang iyang .45 nga pistola samtang nisunod sab sa pagpabuto si Mag-aso gamit ang .357 nga revolver.

Kini maoy rason nga napugos pagbawos ang kapulisan ngadto sa mga suspetsado. Ang duha parehong nangaigo ug patay na pag-abot sa tambalanan.

Wala na sila’y nakuha nga ilegal nga drugas o paraphernalia gikan sa duha. Wala pu’y lain nadakpan ang kapulisan.

Gibutyag ni Batobalonos nga pag-umangkon si Brion sa Talisay drug queen nga si Marissa Obrero, nga bag-o lang sad nadakpan sa Davao del Norte.

“Dugay na ni siya nga high-value target sa Talisay City and he is the direct nephew of the Talisay drug queen,” sigon ni Batobalonos.

Mas palawman pa sa kapulisan ang ilang imbestigasyon aron masuta ang suppliers ni Brion.

Samtang  nasikop usab diha sa Barangay  Mactan, Dakbayan sa Lapu-Lapu alas 2  pasado ang takna sa miaging kaadlawon si Melvin Berame Ymbong,48, taga Sitio Toril  sa Barangay  Canjulao sa maong dakbayan.

Si Police Superintendent  Mark Gifter  Sucalit mitug-an nga si Ymbong gidakop pinasikad sa warrant of arrest nga giluwatan ni Judge  Pamela A. Baring,  sa Regional Trial Court (RTC) 7 sa  Branch 53, sa Dakbayan sa Sugbo may labot sa kaso sa ilegal nga drugas ug walay girekomendar nga piyansa alang sa temporaryo niyang kagawasan. (Romeo T. Limpangog/IBM)(BANAT NEWS)