Upat gipamusil atol sa pagsugat sa Pasko

CEBU, Philippines — Buhi apan nakahiagum og mga grabeng angol sa ilang tagsa-tagsa ka mga lawas ang upat ka mga lalaki human sila mabiktima sa pagpamusil atol sa pagsugat nila sa pasko didto sa Barangay Puertobello sa lungsod sa Tudela, isla sa Camotes

Si Police  Inspector Uswaldo Layson nga maoy hepe  sa  Tudela  Police  Station miila sa biktima nga mao sila si   Tyron Lacbayo, Julius Otero, Choy Riegi Argomedo ug  Vern Ives Rojas nga pulos nagpuyo sa maong dapit. Si Police Inspector  Layson midetalye nga naglakaw  lang  padulong pauli ang  mga biktima   sa  nahisgotang dapit dihang ilang nasugatan ang grupo sa mga lalaki nga gipangulohan sa usa ka  Samsam ug  Sak-Sak   nga giigong mga lumolupyo sa Barangay Cansabusab  sa silingang lungsod sa Poro.

Dugang pa ni  Layson nga samtang naglakaw ang mga biktima sa maong dapit  kalit mitumaw ang grupo sa mga lalaki  ug  ang usa kalit  nanukmag ngadto kang  Lacbayo nga nakaaghat  sa iyang mga kauban sa  pagtabang sa paglingkawas  niini.

Human sa maong pagpamusil ang mga  suspetsado dali nga misibat  pahilayo sa maong dapit ug  mga biktima  dali nga gidala sa tambalanan  sa  San Francisco  District   Hospital  samtang ang kapolisan kasamtangan pa nga  naghimo sa ilang imbestigasyon sa maong panghitabo. —/LPM (BANATNEWS)