Uyoan gitabangag tigbas

CEBU, Philippines — Maayong pagkaputol sa kamot sa usa ka 46 anyos nga uyoan human kini gitabangan og tigbas sa iyang duha ka pag-umangkon diha sa Sitio  Balendres,  Barangay  Cadulawan,  Lungsod sa Tabogon.

Si  Police Officer  3  Alex  Ricarte  sa  Tabogon Police Station miila sa biktima nga mao si Roberto Lobitaña,  nagpuyo sa maong  dapit.

Matud pa ni Ricarte  ang mga suspek mao ang managsuong Romeo  Ytang, 30 ug Modesto nga dugay na niining nakabikil.

Dugang pa niya nga dihang nagkita ang biktima ug ang duha   niya ka pag-umangkon ilang nahisgotan  ang karaang panagbikil sa ilang pamilya nga misangko sa mainiton nilang panaglalis.

Matud pang Ricarte wala makapugong ang managsoon sa ilang kapungot ug gitabangan og tigbas ang uyoan sa nagkadaiyang bahin sa kalawasan sa biktima.

Walay nahimo ang biktima gawas sa pag-atras ug pagpanagang gamit iyang bukton hangtud nga naputol kini.

Ang managsuon dali nga misibat pahilayo apan  ang usa sa mga suspetsado nga si Romeo  nakahukom sa pagtahan  sa iyang kaugalingon ngadto sa kapolisan samtang gipangita ang iyang igsuon nga si Modesto. (/IBM)(BANATNEWS)