P15M gitagana para sa mga habal habal

CEBU, Philippines – Daghang mga habalhabal drayber ang wala una mobiyahe sa nagkadaiyang dapit sa Metro Cebu sa kabalaka nga masugatan sa mga sakop sa Land Transportation Office (LTO)-7 ug sa Land Transportation Franchising and Regulatory Board (LTFRB)-7.

Una nang mipakanaug ang Korte Suprema niadtong miaging semana nga ilegal ang operasyon sa mga motorsiklo nga himoong pasaheroan lukop nasud.

Sa maong kalambuan, nalipay ang mga drayber sa PUJ ug taxi kay nahimo man nilang kakumpitensiya ang Angkas, usa ka motorcycle ride-hailing app diin mogamit og mobile phone ang mga pasahero aron sila makuha ug mahatud sa ilang destinasyon sa mas paspas nga oras kun ikumpara nga mosakay og jeep o taxi.

Subay niini, ang konseho sa Siyudad sa Sugbo motagana og kinse milyones pesos isip emergency assistance sa tanang motorcycle-for-hire sa dakbayan.

Kini human ang konseho mitugot sa resolusyon nga gi-sponsor ni Konsehal Mary Ann delos Santos nga nagtugot sa executive department nga mo-charge sa P15 million sa Philippine Amusement and Gaming Corporation (PAGCOR) funds.

Si Konsehal delos Santos mihimo sa maong lakang aron pagtabang sa mga habalhabal drivers ilabi na kadtong mga Angkas drivers. Base sa record, adunay kwatro mil ka mga Angkas drivers ug 2,500 ang profiled nga habalhabal drivers sa Cebu City.

Nakadesisyon si Mayor Tomas Osmeña nga ilakip ang habalhabal drivers sanglit nakatabang man sab sila sa pagtubag sa transportation concern sa mga sumasakay.

“I’m very worried about this, not only for the habal-habal drivers but really for the riding public kay akong gi-monitor bisan karon nakuwangan mi og public transportation bisan sa kuan they’re waiting for jeepneys now without the habalhabals mosamot ni siya”, matud sa mayor.

Ang executive department mo-set og guidelines alang sa assistance nga ihatag sa habalhabal drivers.

Dugang ni delos Santos nga ang kagamhanan sa siyudad mosusi kun unsa nga tabang ang ilang mahatag ngadto sa mga habalhabal drivers. Diin ilang gitinguha nga sa dili pa matapos ang tuig, mahatag na kini.

Aron pagtubag sab sa maong isyu sa habalhabal, ang konseho mihangyo sab sa South ug North District Representatives ingon man sa Cebu Province nga paspasan ang paghimo og balaud nga mag-legalize sa operasyon sa habalhabal isip public transportation.

Samtang ang city government mopahigayon unya og misa alang sa mga apektadong Angkas drivers karong umaabot nga Domingo diin ang mo-misa mao si Cebu Archbishop Jose Palma. (Decemay P. Padilla/DILT)(BANAT NEWS)