Mga building sa Kawit Island gub-on

CEBU, Philippines — Gikatakdang gub-on ang tanang building nga iya sa Siyudad sa Sugbo nga anaa sa Kawit Island sa South Road Properties alang sa construction sa P18 billion nga integrated resort ug casino.

Si Francisco Fernandez, mayor’s executive assistant nagkanayon nga magtigom ang opisyales sa siyudad ug sa Universal Hotels and Resorts, Inc. karong Lunes aron hisgotan ang maong pagguba sa mga edipisyo.

Lakip sa maong P18 bilyones nga proyekto ang commercial o shopping center, integrated resort facility, convention center, performing arts theater, themed park ug inconic public art, hotels, parking lot ug ang casino.

Ubos sa Joint Venture Agreement nga ang UHRI magtukod og laing building aron ilisdan ang mga maguba nga building nga walay gasto ang siyudad.

Matud ni Fernandez nga hangyuon sa siyudad ang UHRI nga sa buwan sa Marso na sugdan ang demolition sa mga building aron sakto usab nga mahuman ang bag-ong building.

Dugang ni Fernandez nga aduna nay fencing permit ang UHRI ug gisugdan na nila og koral ang siyam ka ektarya nga Kawit Island nga maoy tukoran sa integrated resort ug casino.  (/BDB)(BANATNEWS)