Biktima sa landslide sa Naga makabalik na
CEBU, Philippines – Mamahimo na nga magsaulog sa pasko ang mga pamilya nga nabiktima sa landslide didto sa sitio Sindulan sa Barangay Tinaan, siyudad sa Naga.
Atol sa Provincial Disaster Risk Reduction and Management Council meeting kagahapon, si Naga City Mayor Kristine Vanessa Chiong miingon nga gibasehan nila ang hukom sa pagpabalik sa mga pamilya sa gihimong reassessment o “harmonized assessment on the critical zone” sa Department of Environment and Natural Resources (DENR) ug sa Mines and Geosciences Bureau (MGB).
Hinoon matod ni Chiong nga kinahanglan pa moadto sa city hall ang pamilya aron nga mapaubos sila sa gitawag nga “IEC” o ang Information, Education, Communication activity kon diin hatagan og igong impormasyon ang matag pamilya kon asa sila nga zone ug kon unsay sitwasyon sa ilang dapit.
Ang gitugtan pagbalik mao ang 970 ka pamilya didto nga gi-idenfity nga anaa sa “green zone” ug “red zone”.
“We are calling them, the evacuees per cluster, katong naa sa green zone ug red para ma storyahan sila, unsay situation like for instance in the green zone, ma-aware sila nga naa sila sa green zone, these are okay na for settlement and for new development and structures but subject to mga ingon ani nga assessment or studies especially kun dagko ang construction or in the red zone you are allowed to go back but should always be advised nga magbantay gyud sila especially in time og uwan , in times nga naay bagyo nga immediately if kinahanglan mo evacuate dili na sila angay storyahan sa gobyerno” matud pa ni Chiong.
Ang Naga nag-andam usab og financial assistance ngadto sa mga mobalik sa ilang pinuy-anan. Hinuon adunay 444 ka pamilya nga anaa nag puyo sa 'critical zone' maoy dili na gyud mamahimo makabalik sa ilang panimalay.
Kasamtangan nga nag-abang o nakipuyo sa ilang mga kabanay ang maong mga pamilya ug naghulat na lang nga mahuman ang relocation site didto sa Balili property. (/LPM)(BANAT NEWS)
- Latest
